Read the Bible

¹ Magistro chori. Secundum Iduthun. PSALMUS. David. [62:2] In Deo tantum quiesce, anima mea, ab ipso enim salutare meum. ² [62:3] Verumtamen ipse refugium meum et salutare meum, praesidium meum; non movebor amplius. ³ [62:4] Quousque irruitis in hominem, contunditis universi vos tamquam parietem inclinatum et maceriam depulsam? ⁴ [62:5] Verumtamen de excelso suo cogitaverunt depellere; delectabantur mendacio. Ore suo benedicebant et corde suo maledicebant. ⁵ [62:6] In Deo tantum quiesce, anima mea, quoniam ab ipso patientia mea. ⁶ [62:7] Verumtamen ipse Deus meus et salutare meum, praesidium meum; non movebor. ⁷ [62:8] In Deo salutare meum et gloria mea; Deus fortitudinis meae, et refugium meum in Deo est.

⁸ [62:9] Sperate in eo, omnis congregatio populi, effundite coram illo corda vestra; Deus refugium nobis. ⁹ [62:10] Verumtamen vanitas filii Adam, mendacium filii hominum. In stateram si conscendant, super fumum leves sunt omnes. ¹⁰ [62:11] Nolite sperare in violentia et in rapina nolite decipi; divitiae si affluant, nolite cor apponere. ¹¹ [62:12] Semel locutus est Deus, duo haec audivi: quia potestas Deo est, ¹² [62:13] et tibi, Domine, misericordia; quia tu reddes unicuique iuxta opera sua.