Read the Bible

¹ Magistro chori. Secundum " Lilium praecepti ". Miktam. David. Ad docendum. [60:2] Quando contra Aram Naharaim et Aram Soba egressus est, et quando Ioab reversus devicit Edom in valle Salis: duodecim milia (hominum). ² [60:3] Deus, reppulisti nos, destruxisti nos. Iratus es. Convertere ad nos! ³ [60:4] Concussisti terram, confregisti eam; sana contritiones eius, quia commota est. ⁴ [60:5] Ostendisti populo tuo dura, potasti nos vino vertiginis. ⁵ [60:6] Dedisti metuentibus te signum, ut fugiant a facie arcus.

⁶ [60:7] Ut liberentur dilecti tui, salvos fac dextera tua et exaudi nos. ⁷ [60:8] Deus locutus est in sancto suo: "Laetabor et partibor Sichimam et convallem Succoth metibor. ⁸ [60:9] Meus est Galaad, et meus est Manasses, et Ephraim fortitudo capitis mei. Iuda sceptrum meum, ⁹ [60:10] Moab olla lavacri mei. Super Idumaeam extendam calceamentum meum, super Philistaeam vociferabor". ¹⁰ [60:11] Quis adducet me in civitatem munitam? Quis deducet me usque in Idumaeam? ¹¹ [60:12] Nonne tu, Deus, qui reppulisti nos; et non egredieris, Deus, in virtutibus nostris? Da nobis auxilium de tribulatione, quia vana salus hominis. ¹² [60:13] In Deo faciemus virtutem, et ipse conculcabit tribulantes nos.