Read the Bible

¹ Magistro chori. Secundum " Ionat elem rehoqim ". David. Miktam. Cum Gath Philistaei eum tenerent.[56:2] Miserere mei, Deus, quoniam conculcavit me homo, tota die impugnans oppressit me. ² [56:3] Conculcaverunt me inimici mei tota die, quoniam multi pugnant adversum me, Altissime. ³ [56:4] In quacumque die timebo, ego in te sperabo. ⁴ [56:5] In Deo, cuius laudabo sermonem, in Deo speravi; non timebo: quid faciet mihi caro? ⁵ [56:6] Tota die rem meam perturbabant, adversum me omnes cogitationes eorum in malum. ⁶ [56:7] Concitabant iurgia, insidiabantur, ipsi calcaneum meum observabant. Sicut quaesierunt animam meam, ⁷ [56:8] ita pro iniquitate retribue illis, in ira populos prosterne, Deus.

⁸ [56:9] Peregrinationes meas tu numerasti: pone lacrimas meas in utre tuo; nonne in supputatione tua? ⁹ [56:10] Tunc convertentur inimici mei retrorsum, in quacumque die invocavero: ecce cognovi quoniam Deus meus es. ¹⁰ [56:11] In Deo, cuius laudabo sermonem, in Domino, cuius laudabo sermonem, ¹¹ [56:12] in Deo speravi; non timebo: quid faciet mihi homo? ¹² [56:13] Super me sunt, Deus, vota tua; reddam laudationes tibi, ¹³ [56:14] quoniam eripuisti animam meam de morte et pedes meos de lapsu, ut ambulem coram Deo in lumine viventium.