Read the Bible

¹ Magistro chori. Secundum " Ne destruxeris ". David. Miktam. Quando a Saul in cavernam fugit. [57:2] Miserere mei, Deus, miserere mei, quoniam in te confugit anima mea; et in umbra alarum tuarum confugiam, donec transeant insidiae. ² [57:3] Clamabo ad Deum Altissimum, Deum, qui benefecit mihi. ³ [57:4] Mittet de caelo et liberabit me; dabit in opprobrium conculcantes me. Mittet Deus misericordiam suam et veritatem suam. ⁴ [57:5] Anima mea recumbit in medio catulorum leonum devorantium filios hominum. Dentes eorum arma et sagittae, et lingua eorum gladius acutus. ⁵ [57:6] Exaltare super caelos, Deus, super omnem terram gloria tua. ⁶ [57:7] Laqueum paraverunt pedibus meis, et incurvavit se anima mea; foderunt ante faciem meam foveam, et ipsi inciderunt in eam.

⁷ [57:8] Paratum cor meum, Deus, paratum cor meum; ⁸ [57:9] cantabo et psalmum dicam. Exsurge, gloria mea; exsurge, psalterium et cithara, excitabo auroram. ⁹ [57:10] Confitebor tibi in populis, Domine, et psalmum dicam tibi in nationibus, ¹⁰ [57:11] quoniam magnificata est usque ad caelos misericordia tua, et usque ad nubes veritas tua. ¹¹ [57:12] Exaltare super caelos, Deus, super omnem terram gloria tua.