Read the Bible

¹ Magistro chori. Fidibus. Maskil. David. [55:2] Auribus percipe, Deus, orationem meam et ne abscondaris a deprecatione mea; ² [55:3] intende mihi et exaudi me. Excussus sum in meditatione mea et conturbatus sum ³ [55:4] a voce inimici et a tribulatione peccatoris. Quoniam devolverunt in me iniquitatem et in ira molesti erant mihi. ⁴ [55:5] Cor meum torquetur intra me, et formido mortis cecidit super me. ⁵ [55:6] Timor et tremor venerunt super me, et contexit me pavor. - ⁶ [55:7] Et dixi: "Quis dabit mihi pennas sicut columbae, et volabo et requiescam? ⁷ [55:8] Ecce elongabo fugiens et manebo in solitudine. ⁸ [55:9] Exspectabo eum, qui salvum me faciat a spiritu procellae et tempestate".

⁹ [55:10] Dissipa, Domine, divide linguas eorum, quoniam vidi violentiam et contentionem in civitate. ¹⁰ [55:11] Die ac nocte circumeunt eam super muros eius, ¹¹ [55:12] iniquitas et labor et insidiae in medio eius; et non defecit de plateis eius fraudulentia et dolus. ¹² [55:13] Quoniam si inimicus meus maledixisset mihi, sustinuissem utique; et si is qui oderat me, super me magnificatus fuisset, abscondissem me forsitan ab eo. ¹³ [55:14] Tu vero, homo coaequalis meus, familiaris meus et notus meus, ¹⁴ [55:15] qui simul habuimus dulce consortium: in domo Dei ambulavimus in concursu. ¹⁵ [55:16] Veniat mors super illos, et descendant in infernum viventes, quoniam nequitiae in habitaculis eorum, in medio eorum.

¹⁶ [55:17] Ego autem ad Deum clamabo, et Dominus salvabit me. ¹⁷ [55:18] Vespere et mane et meridie meditabor et ingemiscam, et exaudiet vocem meam. ¹⁸ [55:19] Redimet in pace animam meam ab his, qui impugnant me, quoniam in multis sunt adversum me. ¹⁹ [55:20] Exaudiet Deus et humiliabit illos, qui est ante saecula. Non enim est illis commutatio, et non timuerunt Deum. ²⁰ [55:21] Extendit manum suam in socios; contaminavit foedus suum. ²¹ [55:22] Lene super butyrum est os eius, pugna autem cor illius: molliti sunt sermones eius super oleum, et ipsi sunt gladii destricti. - ²² [55:23] Iacta super Dominum curam tuam, et ipse te enutriet; non dabit in aeternum fluctuationem iusto. ²³ [55:24] Tu vero, Deus, deduces eos in puteum interitus. Viri sanguinum et dolosi non dimidiabunt dies suos; ego autem sperabo in te, Domine.