Read the Bible

¹ Magistro chori. Filiorum Core. PSALMUS. [47:2] Omnes gentes, plaudite manibus, iubilate Deo in voce exsultationis, ² [47:3] quoniam Dominus Altissimus, terribilis, rex magnus super omnem terram. ³ [47:4] Subiecit populos nobis et gentes sub pedibus nostris. ⁴ [47:5] Elegit nobis hereditatem nostram, gloriam Iacob, quem dilexit.

⁵ [47:6] Ascendit Deus in iubilo, et Dominus in voce tubae. ⁶ [47:7] Psallite Deo, psallite; psallite regi nostro, psallite. ⁷ [47:8] Quoniam rex omnis terrae Deus, psallite sapienter. ⁸ [47:9] Regnavit Deus super gentes, Deus sedet super sedem sanctam suam. ⁹ [47:10] Principes populorum congregati sunt cum populo Dei Abraham, quoniam Dei sunt scuta terrae: vehementer elevatus est.