Read the Bible

¹ Magistro chori. Filiorum Core. Secundum " Virgines... ". Canticum. [46:2] Deus est nobis refugium et virtus, adiutorium in tribulationibus inventus est nimis. ² [46:3] Propterea non timebimus, dum turbabitur terra, et transferentur montes in cor maris.³ [46:4] Fremant et intumescant aquae eius, conturbentur montes in elatione eius. ⁴ [46:5] Fluminis rivi laetificant civitatem Dei, sancta tabernacula Altissimi. ⁵ [46:6] Deus in medio eius, non commovebitur; adiuvabit eam Deus mane diluculo.

⁶ [46:7] Fremuerunt gentes, commota sunt regna; dedit vocem suam, liquefacta est terra. ⁷ [46:8] Dominus virtutum nobiscum, refugium nobis Deus Iacob. ⁸ [46:9] Venite et videte opera Domini, quae posuit prodigia super terram. Auferet bella usque ad finem terrae, ⁹ [46:10] arcum conteret et confringet arma et scuta comburet igne. ¹⁰ [46:11] Vacate et videte quoniam ego sum Deus: exaltabor in gentibus et exaltabor in terra. ¹¹ [46:12] Dominus virtutum nobiscum, refugium nobis Deus Iacob.