Read the Bible

¹ Magistro chori. Secundum " Lilia... ". Filiorum Core. Maskil. Canticum amoris. [45:2] Eructavit cor meum verbum bonum, dico ego opera mea regi. Lingua mea calamus scribae velociter scribentis. ² [45:3] Speciosus forma es prae filiis hominum, diffusa est gratia in labiis tuis, propterea benedixit te Deus in aeternum. ³ [45:4] Accingere gladio tuo super femur tuum, potentissime, magnificentia tua et ornatu tuo. ⁴ [45:5] Et ornatu tuo procede, currum ascende propter veritatem et mansuetudinem et iustitiam. Et doceat te mirabilia dextera tua: ⁵ [45:6] sagittae tuae acutae - populi sub te cadent - in corda inimicorum regis.

⁶ [45:7] Sedes tua, Deus, in saeculum saeculi; sceptrum aequitatis sceptrum regni tui. ⁷ [45:8] Dilexisti iustitiam et odisti iniquitatem, propterea unxit te Deus, Deus tuus, oleo laetitiae prae consortibus tuis. ⁸ [45:9] Myrrha et aloe et casia omnia vestimenta tua; e domibus eburneis chordae delectant te. ⁹ [45:10] Filiae regum in pretiosis tuis; astitit regina a dextris tuis ornata auro ex Ophir. -

¹⁰ [45:11] Audi, filia, et vide et inclina aurem tuam et obliviscere populum tuum et domum patris tui; ¹¹ [45:12] et concupiscet rex speciem tuam. Quoniam ipse est dominus tuus, et adora eum. ¹² [45:13] Filia Tyri cum muneribus; vultum tuum deprecabuntur divites plebis. ¹³ [45:14] Gloriosa nimis filia regis intrinsecus, texturis aureis circumamicta. ¹⁴ [45:15] In vestibus variegatis adducetur regi; virgines post eam, proximae eius, afferuntur tibi. ¹⁵ [45:16] Afferuntur in laetitia et exsultatione, adducuntur in domum regis. ¹⁶ [45:17] Pro patribus tuis erunt tibi filii; constitues eos principes super omnem terram. ¹⁷ [45:18] Memor ero nominis tui in omni generatione et generatione; propterea populi confitebuntur tibi in aeternum et in saeculum saeculi.