Read the Bible

¹ Magistro chori. PSALMUS. David. [41:2] Beatus, qui intellegit de egeno; in die mala liberabit eum Dominus. ² [41:3] Dominus servabit eum et vivificabit eum et beatum faciet eum in terra et non tradet eum in animam inimicorum eius. ³ [41:4] Dominus opem feret illi super lectum doloris eius; universum stratum eius versabis in infirmitate eius. ⁴ [41:5] Ego dixi: "Domine, miserere mei; sana animam meam, quia peccavi tibi".

⁵ [41:6] Inimici mei dixerunt mala mihi: "Quando morietur, et peribit nomen eius?". ⁶ [41:7] Et si ingrediebatur, ut visitaret, vana loquebatur; cor eius congregabat iniquitatem sibi, egrediebatur foras et detrahebat. ⁷ [41:8] Simul adversum me susurrabant omnes inimici mei; adversum me cogitabant mala mihi: ⁸ [41:9] "Maleficium effusum est in eo; et, qui decumbit, non adiciet ut resurgat". ⁹ [41:10] Sed et homo pacis meae, in quo speravi, qui edebat panem meum, levavit contra me calcaneum. ¹⁰ [41:11] Tu autem, Domine, miserere mei et resuscita me, et retribuam eis. ¹¹ [41:12] In hoc cognovi quoniam voluisti me, quia non gaudebit inimicus meus super me; ¹² [41:13] me autem propter innocentiam suscepisti et statuisti me in conspectu tuo in aeternum. ¹³ [41:14] Benedictus Dominus, Deus Israel, a saeculo et usque in saeculum. Fiat, fiat.