Read the Bible

¹ Magistro chori. David. PSALMUS. [40:2] Exspectans exspectavi Dominum, et intendit mihi. ² [40:3] Et exaudivit clamorem meum et eduxit me de lacu miseriae et de luto faecis; et statuit super petram pedes meos et firmavit gressus meos. ³ [40:4] Et immisit in os meum canticum novum, carmen Deo nostro. Videbunt multi et timebunt et sperabunt in Domino. ⁴ [40:5] Beatus vir, qui posuit Dominum spem suam et non respexit superbos et declinantes in mendacium. ⁵ [40:6] Multa fecisti tu, Domine Deus meus, mirabilia tua, et cogitationes tuas pro nobis: non est qui similis sit tibi. Si nuntiare et eloqui voluero, multiplicabuntur super numerum.

⁶ [40:7] Sacrificium et oblationem noluisti, aures autem fodisti mihi. Holocaustum et pro peccato non postulasti, ⁷ [40:8] tunc dixi: "Ecce venio. In volumine libri scriptum est de me. ⁸ [40:9] Facere voluntatem tuam, Deus meus, volui; et lex tua in praecordiis meis". ⁹ [40:10] Annuntiavi iustitiam tuam in ecclesia magna; ecce labia mea non prohibebo, Domine, tu scisti. ¹⁰ [40:11] Iustitiam tuam non abscondi in corde meo, veritatem tuam et salutare tuum dixi. Non abscondi misericordiam tuam et veritatem tuam ab ecclesia magna.

¹¹ [40:12] Tu autem, Domine, ne prohibeas miserationes tuas a me; misericordia tua et veritas tua semper suscipiant me, ¹² [40:13] quoniam circumdederunt me mala, quorum non est numerus; comprehenderunt me iniquitates meae, et non potui videre. Multiplicatae sunt super capillos capitis mei, et cor meum dereliquit me. ¹³ [40:14] Complaceat tibi, Domine, ut eruas me; Domine, ad adiuvandum me festina. ¹⁴ [40:15] Confundantur et revereantur simul, qui quaerunt animam meam, ut auferant eam. Avertantur retrorsum et erubescant, qui volunt mihi mala. ¹⁵ [40:16] Obstupescant propter confusionem suam, qui dicunt mihi: "Euge, euge". ¹⁶ [40:17] Exsultent et laetentur in te omnes quaerentes te; et dicant semper: "Magnificetur Dominus", qui diligunt salutare tuum. ¹⁷ [40:18] Ego autem egenus et pauper sum; Dominus sollicitus est mei. Adiutor meus et liberator meus tu es; Deus meus, ne tardaveris.