Read the Bible

¹ Magistro chori, Idithun. PSALMUS. David. [39:2] Dixi: "Custodiam vias meas, ut non delinquam in lingua mea; ponam ori meo custodiam, donec consistit peccator adversum me". ² [39:3] Tacens obmutui et silui absque ullo bono, et dolor meus renovatus est. ³ [39:4] Concaluit cor meum intra me, et in meditatione mea exarsit ignis. ⁴ [39:5] Locutus sum in lingua mea: "Notum fac mihi, Domine, finem meum; et numerum dierum meorum quis est, ut sciam quam brevis sit vita mea". ⁵ [39:6] Ecce paucorum palmorum fecisti dies meos, et spatium vitae meae tamquam nihilum ante te. Etenim universa vanitas omnis homo constitutus est. ⁶ [39:7] Etenim ut imago pertransit homo. Etenim vanitas est et concitatur; thesaurizat et ignorat quis congregabit ea.

⁷ [39:8] Et nunc quae est exspectatio mea, Domine? Spes mea apud te est. ⁸ [39:9] Ab omnibus iniquitatibus meis erue me, opprobrium insipienti ne ponas me. ⁹ [39:10] Obmutui et non aperiam os meum, quoniam tu fecisti. ¹⁰ [39:11] Amove a me plagas tuas: ab ictu manus tuae ego defeci. ¹¹ [39:12] In increpationibus, propter iniquitatem, corripuisti hominem, et tabescere fecisti, sicut tinea, desiderabilia eius. Etenim vanitas omnis homo. ¹² [39:13] Exaudi orationem meam, Domine, et clamorem meum auribus percipe. Ad lacrimas meas ne obsurdescas, quoniam advena ego sum apud te, peregrinus sicut omnes patres mei. ¹³ [39:14] Avertere a me, ut refrigerer, priusquam abeam et non sim amplius.