Read the Bible

¹ PSALMUS. David. Ad commemorandum. [38:2] Domine, ne in furore tuo arguas me neque in ira tua corripias me, ² [38:3] quoniam sagittae tuae infixae sunt mihi, et descendit super me manus tua. ³ [38:4] Non est sanitas in carne mea a facie indignationis tuae, non est pax ossibus meis a facie peccatorum meorum. ⁴ [38:5] Quoniam iniquitates meae supergressae sunt caput meum et sicut onus grave gravant me nimis. - ⁵ [38:6] Putruerunt et corrupti sunt livores mei a facie insipientiae meae. ⁶ [38:7] Inclinatus sum et incurvatus nimis; tota die contristatus ingrediebar. ⁷ [38:8] Quoniam lumbi mei impleti sunt ardoribus, et non est sanitas in carne mea. ⁸ [38:9] Afflictus sum et humiliatus sum nimis, rugiebam a gemitu cordis mei. ⁹ [38:10] Domine, ante te omne desiderium meum, et gemitus meus a te non est absconditus. ¹⁰ [38:11] Palpitavit cor meum, dereliquit me virtus mea, et lumen oculorum meorum, et ipsum non est mecum. ¹¹ [38:12] Amici mei et proximi mei procul a plaga mea steterunt, et propinqui mei de longe steterunt.

¹² [38:13] Et laqueos posuerunt, qui quaerebant animam meam; et, qui requirebant mala mihi, locuti sunt insidias et dolos tota die meditabantur. ¹³ [38:14] Ego autem tamquam surdus non audiebam et sicut mutus non aperiens os suum; ¹⁴ [38:15] et factus sum sicut homo non audiens et non habens in ore suo redargutiones. ¹⁵ [38:16] Quoniam in te, Domine, speravi, tu exaudies, Domine Deus meus. ¹⁶ [38:17] Quia dixi: "Ne quando supergaudeant mihi; dum commoventur pedes mei, magnificantur super me". ¹⁷ [38:18] Quoniam ego in lapsum paratus sum, et dolor meus in conspectu meo semper. ¹⁸ [38:19] Quoniam iniquitatem meam annuntiabo et sollicitus sum de peccato meo. ¹⁹ [38:20] Inimici autem mei vivunt et confirmati sunt; et multiplicati sunt, qui oderunt me inique. ²⁰ [38:21] Retribuentes mala pro bonis detrahebant mihi, pro eo quod sequebar bonitatem. ²¹ [38:22] Ne derelinquas me, Domine; Deus meus, ne discesseris a me. ²² [38:23] Festina in adiutorium meum, Domine, salus mea.