Read the Bible

¹ Magistro chori. Maskil. Filiorum Core. [42:2] Quemadmodum desiderat cervus ad fontes aquarum, ita desiderat anima mea ad te, Deus. ² [42:3] Sitivit anima mea ad Deum, Deum vivum; quando veniam et apparebo ante faciem Dei? ³ [42:4] Fuerunt mihi lacrimae meae panis die ac nocte, dum dicitur mihi cotidie: "Ubi est Deus tuus?". ⁴ [42:5] Haec recordatus sum et effudi in me animam meam; quoniam transibam in locum tabernaculi admirabilis usque ad domum Dei in voce exsultationis et confessionis multitudinis festa celebrantis. ⁵ [42:6] Quare tristis es, anima mea, et quare conturbaris in me? Spera in Deo, quoniam adhuc confitebor illi, salutare vultus mei et Deus meus.

⁶ [42:7] In meipso anima mea contristata est; propterea memor ero tui de terra Iordanis et Hermonim, de monte Misar. ⁷ [42:8] Abyssus abyssum invocat in voce cataractarum tuarum; omnes gurgites tui et fluctus tui super me transierunt. ⁸ [42:9] In die mandavit Dominus misericordiam suam, et nocte canticum eius apud me est: oratio ad Deum vitae meae. ⁹ [42:10] Dicam Deo: "Susceptor meus es. Quare oblitus es mei, et quare contristatus incedo, dum affligit me inimicus?". ¹⁰ [42:11] Dum confringuntur ossa mea, exprobraverunt mihi, qui tribulant me, dum dicunt mihi quotidie: "Ubi est Deus tuus?". - ¹¹ [42:12] Quare tristis es, anima mea, et quare conturbaris in me? Spera in Deo, quoniam adhuc confitebor illi, salutare vultus mei et Deus meus.