Read the Bible

¹ Magistro chori. Fidibus. PSALMUS. David. [4:2] Cum invocarem, exaudivit me Deus iustitiae meae. In tribulatione dilatasti mihi; miserere mei et exaudi orationem meam. ² [4:3] Filii hominum, usquequo gravi corde? Ut quid diligitis vanitatem et quaeritis mendacium? ³ [4:4] Et scitote quoniam mirificavit Dominus sanctum suum; Dominus exaudiet, cum clamavero ad eum. ⁴ [4:5] Irascimini et nolite peccare; loquimini in cordibus vestris, in cubilibus vestris et conquiescite. ⁵ [4:6] Sacrificate sacrificium iustitiae et sperate in Domino.

⁶ [4:7] Multi dicunt: "Quis ostendit nobis bona?". Leva in signum super nos lumen vultus tui, Domine! ⁷ [4:8] Maiorem dedisti laetitiam in corde meo, quam cum multiplicantur frumentum et vinum eorum. ⁸ [4:9] In pace in idipsum dormiam et requiescam, quoniam tu, Domine, singulariter in spe constituisti me.