Read the Bible

¹ Magistro chori. Ad tibias. PSALMUS. David. [5:2] Verba mea auribus percipe, Domine; intellege gemitum meum. ² [5:3] Intende voci clamoris mei, rex meus et Deus meus. ³ [5:4] Quoniam ad te orabo, Domine, mane exaudies vocem meam; mane astabo tibi et exspectabo. ⁴ [5:5] Quoniam non Deus volens iniquitatem tu es; neque habitabit iuxta te malignus, ⁵ [5:6] neque permanebunt iniusti ante oculos tuos. ⁶ [5:7] Odisti omnes, qui operantur iniquitatem, perdes omnes, qui loquuntur mendacium; virum sanguinum et dolosum abominabitur Dominus.

⁷ [5:8] Ego autem in multitudine misericordiae tuae introibo in domum tuam; adorabo ad templum sanctum tuum in timore tuo. ⁸ [5:9] Domine, deduc me in iustitia tua propter inimicos meos, dirige in conspectu meo viam tuam. ⁹ [5:10] Quoniam non est in ore eorum veritas, cor eorum fovea; sepulcrum patens est guttur eorum, molliunt linguas suas. ¹⁰ [5:11] Iudica illos, Deus; decidant a cogitationibus suis; secundum multitudinem impietatum eorum expelle eos, quoniam irritaverunt te, Domine. ¹¹ [5:12] Et omnes, qui sperant in te, laetentur, in aeternum exsultent. Obumbrabis eis, et gloriabuntur in te, qui diligunt nomen tuum; ¹² [5:13] quoniam tu benedices iusto, Domine, quasi scuto, bona voluntate coronabis eum.