Read the Bible

¹ David. Iudica, Domine, iudicantes me; impugna impugnantes me. ² Apprehende clipeum et scutum et exsurge in adiutorium mihi. ³ Effunde frameam et securim adversus eos, qui persequuntur me. Dic animae meae: "Salus tua ego sum". ⁴ Confundantur et revereantur quaerentes animam meam; avertantur retrorsum et confundantur cogitantes mihi mala. ⁵ Fiant tamquam pulvis ante ventum, et angelus Domini impellens eos; ⁶ fiat via illorum tenebrae et lubricum, et angelus Domini persequens eos. ⁷ Quoniam gratis absconderunt mihi laqueum suum, gratis foderunt foveam animae meae. ⁸ Veniat illi calamitas, quam ignorat, et captio, quam abscondit, apprehendat eum, et in eandem calamitatem ipse cadat. ⁹ Anima autem mea exsultabit in Domino et delectabitur super salutari suo. ¹⁰ Omnia ossa mea dicent: "Domine, quis similis tibi? Eripiens inopem de manu fortiorum eius, egenum et pauperem a diripientibus eum".

¹¹ Surgentes testes iniqui, quae ignorabam, interrogabant me; ¹² retribuebant mihi mala pro bonis, desolatio est animae meae. ¹³ Ego autem, cum infirmarentur, induebar cilicio, humiliabam in ieiunio animam meam; et oratio mea in sinu meo convertebatur. ¹⁴ Quasi pro proximo et quasi pro fratre meo ambulabam, quasi lugens matrem contristatus incurvabar. ¹⁵ Cum autem vacillarem, laetati sunt et convenerunt; convenerunt contra me percutientes, et ignoravi. ¹⁶ Diripuerunt et non desistebant; tentaverunt me, subsannaverunt me subsannatione, frenduerunt super me dentibus suis.

¹⁷ Domine, quamdiu aspicies? Restitue animam meam a malignitate eorum, a leonibus unicam meam. ¹⁸ Confitebor tibi in ecclesia magna, in populo multo laudabo te. ¹⁹ Non supergaudeant mihi inimici mei mendaces, qui oderunt me gratis et annuunt oculis. ²⁰ Etenim non pacifice loquebantur et contra mansuetos terrae dolos cogitabant. ²¹ Et dilataverunt super me os suum; dixerunt: "Euge, euge, viderunt oculi nostri". - ²² Vidisti, Domine, ne sileas; Domine, ne discedas a me. ²³ Exsurge et evigila ad iudicium meum, Deus meus et Dominus meus, ad causam meam. ²⁴ Iudica me secundum iustitiam tuam, Domine Deus meus, et non supergaudeant mihi. ²⁵ Non dicant in cordibus suis: "Euge animae nostrae"; nec dicant: "Devoravimus eum". ²⁶ Erubescant et revereantur simul, qui gratulantur malis meis; induantur confusione et reverentia, qui magna loquuntur super me ²⁷ Exsultent et laetentur, qui volunt iustitiam meam, et dicant semper: "Magnificetur Dominus, qui vult pacem servi sui". ²⁸ Et lingua mea meditabitur iustitiam tuam, tota die laudem tuam.