Read the Bible

¹ Magistro chori. David, servi Domini. [36:2] Susurrat iniquitas ad impium in medio cordis eius; non est timor Dei ante oculos eius. ² [36:3] Quoniam blanditur ipsi in conspectu eius, ut non inveniat iniquitatem suam et oderit. ³ [36:4] Verba oris eius iniquitas et dolus, desiit intellegere, ut bene ageret. ⁴ [36:5] Iniquitatem meditatus est in cubili suo, astitit omni viae non bonae, malitiam autem non odivit.

⁵ [36:6] Domine, in caelo misericordia tua, et veritas tua usque ad nubes; ⁶ [36:7] iustitia tua sicut montes Dei, iudicia tua abyssus multa: homines et iumenta salvabis, Domine. ⁷ [36:8] Quam pretiosa misericordia tua, Deus! Filii autem hominum in tegmine alarum tuarum sperabunt; ⁸ [36:9] inebriabuntur ab ubertate domus tuae, et torrente voluptatis tuae potabis eos. ⁹ [36:10] Quoniam apud te est fons vitae, et in lumine tuo videbimus lumen. ¹⁰ [36:11] Praetende misericordiam tuam scientibus te et iustitiam tuam his, qui recto sunt corde. ¹¹ [36:12] Non veniat mihi pes superbiae, et manus peccatoris non moveat me. ¹² [36:13] Ibi ceciderunt, qui operantur iniquitatem, expulsi sunt nec potuerunt stare.