Read the Bible

¹ David, quando se mente alienatum simulavit coram Abimelech et, ab illo dimissus, abiit. [34:2] ALEPH. Benedicam Dominum in omni tempore, semper laus eius in ore meo. ² [34:3] BETH. In Domino gloriabitur anima mea, audiant mansueti et laetentur. ³ [34:4] GHIMEL. Magnificate Dominum mecum, et exaltemus nomen eius in idipsum. ⁴ [34:5] DALETH. Exquisivi Dominum, et exaudivit me et ex omnibus terroribus meis eripuit me. ⁵ [34:6] HE. Respicite ad eum, et illuminamini, et facies vestrae non confundentur. ⁶ [34:7] ZAIN. Iste pauper clamavit, et Dominus exaudivit eum et de omnibus tribulationibus eius salvavit eum. ⁷ [34:8] HETH. Vallabit angelus Domini in circuitu timentes eum et eripiet eos. ⁸ [34:9] TETH. Gustate et videte quoniam suavis est Dominus; beatus vir, qui sperat in eo. ⁹ [34:10] IOD. Timete Dominum, sancti eius, quoniam non est inopia timentibus eum. ¹⁰ [34:11] CAPH. Divites eguerunt et esurierunt, inquirentes autem Dominum non deficient omni bono.

¹¹ [34:12] LAMED. Venite, filii, audite me: timorem Domini docebo vos. ¹² [34:13] MEM. Quis est homo, qui vult vitam, diligit dies, ut videat bonum? - ¹³ [34:14] NUN. Prohibe linguam tuam a malo, et labia tua, ne loquantur dolum. ¹⁴ [34:15] SAMECH. Diverte a malo et fac bonum, inquire pacem et persequere eam. ¹⁵ [34:16] AIN. Oculi Domini super iustos, et aures eius in clamorem eorum. ¹⁶ [34:17] PHE. Vultus autem Domini super facientes mala, ut perdat de terra memoriam eorum. ¹⁷ [34:18] SADE. Clamaverunt, et Dominus exaudivit et ex omnibus tribulationibus eorum liberavit eos. ¹⁸ [34:19] COPH. Iuxta est Dominus iis, qui contrito sunt corde, et confractos spiritu salvabit. ¹⁹ [34:20] RES. Multae tribulationes iustorum, et de omnibus his liberabit eos Dominus. ²⁰ [34:21] SIN. Custodit omnia ossa eorum, unum ex his non conteretur. ²¹ [34:22] TAU. Interficiet peccatorem malitia; et, qui oderunt iustum, punientur. ²² [34:23] PHE. Redimet Dominus animas servorum suorum; et non punientur omnes, qui sperant in eo.