Read the Bible

¹ Locutusque est Dominus ad Moysen dicens: ² "Praecipe fi liis Israel et dices ad eos: Cum ingressi fueritis terram hanc Chanaan, et in possessionem vobis sorte ceciderit, his finibus terminabitur. ³ Pars meridiana incipiet a solitudine Sin, quae est iuxta Edom, et habebit terminos contra orientem mare Salsissimum. ⁴ Qui circuibunt australem plagam per ascensum Acrabbim (id est Scorpionum), ita ut transeant in Sin et perveniant ad meridiem Cadesbarne, unde egredientur ad Asaraddar et tendent usque ad Asemona. ⁵ Ibitque per gyrum terminus ab Asemona usque ad torrentem Aegypti, et maris Magni litore finietur. ⁶ Plaga autem occidentalis a mari Magno incipiet et ipso fine claudetur. ⁷ Porro ad septentrionalem plagam a mari Magno termini incipient pervenientes usque ad montem Hor, ⁸ a quo venient in introitum Emath usque ad terminos Sedada. ⁹ Ibuntque confinia usque ad Zephrona et Asarenon. Hi erunt termini in parte aquilonis. ¹⁰ Inde metabuntur fines contra orientalem plagam de Asarenon usque Sephama; ¹¹ et de Sephama descendent termini in Rebla ad orientem Ain; inde descendent et pervenient ad latus maris Chenereth in oriente ¹² et tendent usque ad Iordanem, et ad ultimum Salsissimo claudentur mari. Hanc habebitis terram per fines suos in circuitu". ¹³ Praecepitque Moyses filiis Israel dicens: "Haec erit terra, quam possidebitis sorte et quam iussit Dominus dari novem tribubus et dimidiae tribui. ¹⁴ Tribus enim filiorum Ruben per familias suas et tribus filiorum Gad iuxta cognationum numerum media quoque tribus Manasse, ¹⁵ id est duae semis tribus, acceperunt partem suam trans Iordanem contra Iericho ad orientalem plagam".

¹⁶ Et ait Dominus ad Moysen: ¹⁷ "Haec sunt nomina virorum, qui terram vobis divident: Eleazar sacerdos et Iosue filius Nun ¹⁸ et singuli principes de tribubus singulis, ¹⁹ quorum ista sunt vocabula: de tribu Iudae Chaleb filius Iephonne; ²⁰ de tribu Simeon Samuel filius Ammiud; ²¹ de tribu Beniamin Elidad filius Chaselon; ²² de tribu filiorum Dan Bocci filius Iogli. ²³ Filiorum Ioseph: de tribu Manasse Hanniel filius Ephod, ²⁴ de tribu Ephraim Camuel filius Sephtan. ²⁵ De tribu Zabulon Elisaphan filius Pharnach; ²⁶ de tribu Issachar dux Phaltiel filius Ozan; ²⁷ de tribu Aser Ahiud filius Salomi; ²⁸ de tribu Nephthali Phedael filius Ammiud". ²⁹ Hi sunt, quibus praecepit Dominus, ut dividerent filiis Israel terram Chanaan.