Read the Bible

¹ Hae sunt mansiones filiorum Israel, qui egressi sunt de Ae gypto per turmas suas in manu Moysi et Aaron, ² quas descripsit Moyses iuxta castrorum loca, quae Domini iussione mutabant. ³ Profecti igitur de Ramesse mense primo, quinta decima die mensis primi, altera die Paschae, filii Israel in manu excelsa, videntibus cunctis Aegyptiis ⁴ et sepelientibus primogenitos, quos percusserat Dominus, nam et in diis eorum exercuerat ultionem, ⁵ castrametati sunt in Succoth. ⁶ Et de Succoth venerunt in Etham, quae est in extremis finibus solitudinis. ⁷ Inde egressi venerunt contra Phihahiroth, quae respicit Beelsephon, et castrametati sunt ante Magdolum. ⁸ Profectique de Phihahiroth transierunt per medium mare in solitudinem, et ambulantes tribus diebus per desertum Etham castrametati sunt in Mara. ⁹ Profectique de Mara venerunt in Elim, ubi erant duodecim fontes aquarum et palmae septuaginta; ibique castrametati sunt. ¹⁰ Sed et inde egressi fixerunt tentoria super mare Rubrum. Profectique de mari Rubro ¹¹ castrametati sunt in deserto Sin; ¹² unde egressi venerunt in Daphca. ¹³ Profectique de Daphca castrametati sunt in Alus. ¹⁴ Egressique de Alus in Raphidim fixere tentoria, ubi populo defuit aqua ad bibendum; ¹⁵ profectique de Raphidim castrametati sunt in deserto Sinai. ¹⁶ Sed et de solitudine Sinai egressi venerunt ad Cibrottaava; ¹⁷ profectique de Cibrottaava castrametati sunt in Aseroth. ¹⁸ Et de Aseroth venerunt in Rethma; ¹⁹ profectique de Rethma castrametati sunt in Remmonphares. ²⁰ Unde egressi venerunt in Lebna; ²¹ de Lebna castrametati sunt in Ressa; ²² egressique de Ressa venerunt in Ceelatha, ²³ unde profecti castrametati sunt in monte Sepher. ²⁴ Egressi de monte Sepher venerunt in Arada; ²⁵ inde proficiscentes castrametati sunt in Maceloth; ²⁶ profectique de Maceloth venerunt in Thahath; ²⁷ de Thahath castrametati sunt in Thare. ²⁸ Unde egressi fixere tentoria in Methca ²⁹ et de Methca castrametati sunt in Hesmona; ³⁰ profectique de Hesmona venerunt in Moseroth. ³¹ Et de Moseroth castrametati sunt in Beneiacan; ³² profectique de Beneiacan venerunt in montem Gadgad; ³³ unde profecti castrametati sunt in Ietebatha. ³⁴ Et de Ietebatha venerunt in Ebrona; ³⁵ egressique de Ebrona castrametati sunt in Asiongaber. ³⁶ Inde profecti venerunt in desertum Sin, hoc est Cades. ³⁷ Egressique de Cades castrametati sunt in monte Hor in extremis finibus terrae Edom. ³⁸ Ascenditque Aaron sacerdos in montem Hor, iubente Domino, et ibi mortuus est anno quadragesimo egressionis filiorum Israel ex Aegypto, mense quinto, prima die mensis, ³⁹ cum esset annorum centum viginti trium. ⁴⁰ Audivitque Chananaeus rex Arad, qui habitabat in Nageb, in terra Chanaan, venisse filios Israel. ⁴¹ Et profecti de monte Hor castrametati sunt in Salmona; ⁴² unde egressi venerunt in Phinon. ⁴³ Profectique de Phinon castrametati sunt in Oboth; ⁴⁴ et de Oboth venerunt in Ieabarim, quae est in finibus Moabitarum. ⁴⁵ Profectique de Ieabarim fixere tentoria in Dibongad; ⁴⁶ unde egressi castrametati sunt in Elmondeblathaim. ⁴⁷ Egressique de Elmondeblathaim venerunt ad montes Abarim contra Nabo. ⁴⁸ Profectique de montibus Abarim transierunt ad campestria Moab supra Iordanem contra Iericho; ⁴⁹ ibique castrametati sunt de Bethiesimoth usque ad Abelsettim in campestribus Moab.

⁵⁰ Ubi locutus est Dominus ad Moysen: ⁵¹ "Praecipe filiis Israel et dic ad eos: Quando transieritis Iordanem intrantes terram Chanaan, ⁵² disperdite cunctos habitatores terrae ante vos, confringite omnes imagines eorum et omnes statuas comminuite atque omnia excelsa vastate. ⁵³ Possidebitis terram et habitabitis in ea. Ego enim dedi vobis illam in possessionem, ⁵⁴ quam dividetis inter tribus vestras. Maiori dabitis latiorem et minori angustiorem; singulis, ut sors ceciderit, ita tribuetur hereditas; per tribus et familias possessio dividetur. ⁵⁵ Sin autem nolueritis expellere habitatores terrae, qui remanserint, erunt vobis quasi spinae in oculis vestris et sudes in lateribus, et adversabuntur vobis in terra habitationis vestrae; ⁵⁶ et, quidquid illis cogitaveram facere, vobis faciam".