Read the Bible

¹ Et respondens Iesus dixit ite rum in parabolis eis dicens: ² "Simile factum est regnum caelorum homini regi, qui fecit nuptias filio suo. ³ Et misit servos suos vocare invitatos ad nuptias, et nolebant venire. ⁴ Iterum misit alios servos dicens: "Dicite invitatis: Ecce prandium meum paravi, tauri mei et altilia occisa, et omnia parata; venite ad nuptias". ⁵ Illi autem neglexerunt et abierunt, alius in villam suam, alius vero ad negotiationem suam; ⁶ reliqui vero tenuerunt servos eius et contumelia affectos occiderunt. ⁷ Rex autem iratus est et, missis exercitibus suis, perdidit homicidas illos et civitatem illorum succendit. ⁸ Tunc ait servis suis: "Nuptiae quidem paratae sunt, sed qui invitati erant, non fuerunt digni; ⁹ ite ergo ad exitus viarum, et quoscumque inveneritis, vocate ad nuptias". ¹⁰ Et egressi servi illi in vias, congregaverunt omnes, quos invenerunt, malos et bonos; et impletae sunt nuptiae discumbentium. ¹¹ Intravit autem rex, ut videret discumbentes, et vidit ibi hominem non vestitum veste nuptiali ¹² et ait illi: "Amice, quomodo huc intrasti, non habens vestem nuptialem?". At ille obmutuit. ¹³ Tunc dixit rex ministris: "Ligate pedes eius et manus et mittite eum in tenebras exteriores: ibi erit fletus et stridor dentium". ¹⁴ Multi enim sunt vocati, pauci vero electi".

¹⁵ Tunc abeuntes pharisaei consilium inierunt, ut caperent eum in sermone. ¹⁶ Et mittunt ei discipulos suos cum herodianis dicentes: "Magister, scimus quia verax es et viam Dei in veritate doces, et non est tibi cura de aliquo; non enim respicis personam hominum. ¹⁷ Dic ergo nobis quid tibi videatur: Licet censum dare Caesari an non?". ¹⁸ Cognita autem Iesus nequitia eorum, ait: "Quid me tentatis, hypocritae? ¹⁹ Ostendite mihi nomisma census". At illi obtulerunt ei denarium. ²⁰ Et ait illis: "Cuius est imago haec et suprascriptio?". ²¹ Dicunt ei: "Caesaris". Tunc ait illis: "Reddite ergo, quae sunt Caesaris, Caesari et, quae sunt Dei, Deo". ²² Et audientes mirati sunt et, relicto eo, abierunt.

²³ In illo die accesserunt ad eum sadducaei, qui dicunt non esse resurrectionem, et interrogaverunt eum ²⁴ dicentes: "Magister, Moyses dixit, si quis mortuus fuerit non habens filios, ut ducat frater eius uxorem illius et suscitet semen fratri suo. ²⁵ Erant autem apud nos septem fratres: et primus, uxore ducta, defunctus est et non habens semen reliquit uxorem suam fratri suo; ²⁶ similiter secundus et tertius usque ad septimum. ²⁷ Novissime autem omnium mulier defuncta est. ²⁸ In resurrectione ergo cuius erit de septem uxor? Omnes enim habuerunt eam". ²⁹ Respondens autem Iesus ait illis: "Erratis nescientes Scripturas neque virtutem Dei; ³⁰ in resurrectione enim neque nubent neque nubentur, sed sunt sicut angeli in caelo. ³¹ De resurrectione autem mortuorum non legistis, quod dictum est vobis a Deo dicente: ³² "Ego sum Deus Abraham et Deus Isaac et Deus Iacob"? Non est Deus mortuorum sed viventium". ³³ Et audientes turbae mirabantur in doctrina eius.

³⁴ Pharisaei autem audientes quod silentium imposuisset sadducaeis, convenerunt in unum. ³⁵ Et interrogavit unus ex eis legis doctor tentans eum: ³⁶ "Magister, quod est mandatum magnum in Lege?". ³⁷ Ait autem illi: "Diliges Dominum Deum tuum in toto corde tuo et in tota anima tua et in tota mente tua: ³⁸ hoc est magnum et primum mandatum. ³⁹ Secundum autem simile est huic: Diliges proximum tuum sicut teipsum. ⁴⁰ In his duobus mandatis universa Lex pendet et Prophetae".

⁴¹ Congregatis autem pharisaeis, interrogavit eos Iesus ⁴² dicens: "Quid vobis videtur de Christo? Cuius filius est?". Dicunt ei: "David". ⁴³ Ait illis: "Quomodo ergo David in Spiritu vocat eum Dominum dicens: ⁴⁴ "Dixit Dominus Domino meo: Sede a dextris meis, donec ponam inimicos tuos sub pedibus tuis"? ⁴⁵ Si ergo David vocat eum Dominum, quomodo filius eius est?". ⁴⁶ Et nemo poterat respondere ei verbum, neque ausus fuit quisquam ex illa die eum amplius interrogare.