Read the Bible

¹ Et cum appropinquassent Hierosolymis et venissent Bethfage, ad montem Oliveti, tunc Iesus misit duos discipulos ² dicens eis: "Ite in castellum, quod contra vos est, et statim invenietis asinam alligatam et pullum cum ea; solvite et adducite mihi. ³ Et si quis vobis aliquid dixerit, dicite: "Dominus eos necessarios habet", et confestim dimittet eos". ⁴ Hoc autem factum est, ut impleretur, quod dictum est per prophetam dicentem: ⁵ "Dicite filiae Sion: Ecce Rex tuus venit tibi, mansuetus et sedens super asinam et super pullum filium subiugalis". ⁶ Euntes autem discipuli fecerunt, sicut praecepit illis Iesus, ⁷ et adduxerunt asinam et pullum; et imposuerunt super eis vestimenta sua, et sedit super ea. ⁸ Plurima autem turba straverunt vestimenta sua in via; alii autem caedebant ramos de arboribus et sternebant in via. ⁹ Turbae autem, quae praecedebant eum et quae sequebantur, clamabant dicentes: "Hosanna filio David! Benedictus, qui venit in nomine Domini! Hosanna in altissimis!". ¹⁰ Et cum intrasset Hierosolymam, commota est universa civitas dicens: "Quis est hic?". ¹¹ Turbae autem dicebant: "Hic est Iesus propheta a Nazareth Galilaeae".

¹² Et intravit Iesus in templum et eiciebat omnes vendentes et ementes in templo, et mensas nummulariorum evertit et cathedras vendentium columbas, ¹³ et dicit eis: "Scriptum est: "Domus mea domus orationis vocabitur". Vos autem facitis eam speluncam latronum". ¹⁴ Et accesserunt ad eum caeci et claudi in templo, et sanavit eos. ¹⁵ Videntes autem principes sacerdotum et scribae mirabilia, quae fecit, et pueros clamantes in templo et dicentes: "Hosanna filio David", indignati sunt ¹⁶ et dixerunt ei: "Audis quid isti dicant?". Iesus autem dicit eis: "Utique; numquam legistis: "Ex ore infantium et lactantium perfecisti laudem"?". ¹⁷ Et relictis illis, abiit foras extra civitatem in Bethaniam ibique mansit.

¹⁸ Mane autem revertens in civitatem, esuriit. ¹⁹ Et videns fici arborem unam secus viam, venit ad eam; et nihil invenit in ea nisi folia tantum et ait illi: "Numquam ex te fructus nascatur in sempiternum". Et arefacta est continuo ficulnea. ²⁰ Et videntes discipuli mirati sunt dicentes: "Quomodo continuo aruit ficulnea?". ²¹ Respondens autem Iesus ait eis: "Amen dico vobis: Si habueritis fidem et non haesitaveritis, non solum de ficulnea facietis, sed et si monti huic dixeritis: "Tolle et iacta te in mare", fiet. ²² Et omnia, quaecumque petieritis in oratione credentes, accipietis".

²³ Et cum venisset in templum, accesserunt ad eum docentem principes sacerdotum et seniores populi dicentes: "In qua potestate haec facis? Et quis tibi dedit hanc potestatem?". ²⁴ Respondens autem Iesus dixit illis: "Interrogabo vos et ego unum sermonem, quem si dixeritis mihi, et ego vobis dicam, in qua potestate haec facio: ²⁵ Baptismum Ioannis unde erat? A caelo an ex hominibus?". At illi cogitabant inter se dicentes: "Si dixerimus: "E caelo", dicet nobis: "Quare ergo non credidistis illi?"; ²⁶ si autem dixerimus: "Ex hominibus", timemus turbam; omnes enim habent Ioannem sicut prophetam". ²⁷ Et respondentes Iesu dixerunt: "Nescimus". Ait illis et ipse: "Nec ego dico vobis in qua potestate haec facio".

²⁸ "Quid autem vobis videtur? Homo quidam habebat duos filios. Et accedens ad primum dixit: "Fili, vade hodie, operare in vinea". ²⁹ Ille autem respondens ait: "Nolo"; postea autem paenitentia motus abiit. ³⁰ Accedens autem ad alterum dixit similiter. At ille respondens ait: "Eo, domine"; et non ivit. ³¹ Quis ex duobus fecit voluntatem patris?". Dicunt: "Primus". Dicit illis Iesus: "Amen dico vobis: Publicani et meretrices praecedunt vos in regnum Dei. ³² Venit enim ad vos Ioannes in via iustitiae, et non credidistis ei; publicani autem et meretrices crediderunt ei. Vos autem videntes nec paenitentiam habuistis postea, ut crederetis ei.

³³ Aliam parabolam audite. Homo erat pater familias, qui plantavit vineam et saepem circumdedit ei et fodit in ea torcular et aedificavit turrim et locavit eam agricolis et peregre profectus est. ³⁴ Cum autem tempus fructuum appropinquasset, misit servos suos ad agricolas, ut acciperent fructus eius. ³⁵ Et agricolae, apprehensis servis eius, alium ceciderunt, alium occiderunt, alium vero lapidaverunt. ³⁶ Iterum misit alios servos plures prioribus, et fecerunt illis similiter. ³⁷ Novissime autem misit ad eos filium suum dicens: "Verebuntur filium meum". ³⁸ Agricolae autem videntes filium dixerunt intra se: "Hic est heres. Venite, occidamus eum et habebimus hereditatem eius". ³⁹ Et apprehensum eum eiecerunt extra vineam et occiderunt. ⁴⁰ Cum ergo venerit dominus vineae, quid faciet agricolis illis?". ⁴¹ Aiunt illi: "Malos male perdet et vineam locabit aliis agricolis, qui reddant ei fructum temporibus suis". ⁴² Dicit illis Iesus: "Numquam legistis in Scripturis: "Lapidem quem reprobaverunt aedificantes, hic factus est in caput anguli; a Domino factum est istud et est mirabile in oculis nostris" ? ⁴³ Ideo dico vobis quia auferetur a vobis regnum Dei et dabitur genti facienti fructus eius. ⁴⁴ Et, qui ceciderit super lapidem istum confringetur; super quem vero ceciderit, conteret eum". ⁴⁵ Et cum audissent principes sacerdotum et pharisaei parabolas eius, cognoverunt quod de ipsis diceret; ⁴⁶ et quaerentes eum tenere, timuerunt turbas, quoniam sicut prophetam eum habebant.