Read the Bible

¹ De hyacintho vero et purpura, cocco ac bysso fecerunt vestes textas pro ministerio sanctuarii. Et fecerunt vestes sacras Aaron, sicut praecepit Dominus Moysi. ² Fecerunt igitur ephod de auro, hyacintho et purpura coccoque et bysso retorta ³ opere polymitario tundentes bratteas aureas et extenuantes in fila, ut possent torqueri cum priorum colorum subtegmine. ⁴ Fasciasque umerales fecerunt ei, cum quibus in utroque latere summitatum suarum copulabatur, ⁵ et balteum, quo constringebatur ephod, eiusdem operis et unum cum eo ex auro, et hyacintho et purpura coccoque et bysso retorta, sicut praeceperat Dominus Moysi. ⁶ Paraverunt et duos lapides onychinos, inclusos texturis aureis et sculptos arte gemmaria nominibus filiorum Israel; ⁷ posueruntque eos in fasciis umeralibus ephod, lapides memorialis filiorum Israel, sicut praeceperat Dominus Moysi. ⁸ Fecerunt et pectorale opere polymito iuxta opus ephod ex auro, hyacintho, purpura coccoque et bysso retorta, ⁹ quadrangulum duplex mensurae palmi. ¹⁰ Et posuerunt in eo gemmarum ordines quattuor: in primo versu erat sardius, topazius, smaragdus; ¹¹ in secundo carbunculus, sapphirus et iaspis; ¹² in tertio hyacinthus, achates et amethystus; ¹³ in quarto chrysolithus, onychinus et beryllus: inclusi textura aurea per ordines suos. ¹⁴ Ipsique lapides duodecim sculpti erant nominibus duodecim tribuum Israel, singuli per nomina singulorum. ¹⁵ Fecerunt in pectorali catenulas quasi funiculos opus tortile de auro purissimo ¹⁶ et duos margines aureos totidemque anulos aureos. Porro duos anulos posuerunt in utraque summitate pectoralis; ¹⁷ duos funiculos aureos inseruerunt anulis, qui in pectoralis angulis eminebant. ¹⁸ Duas summitates amborum funiculorum colligaverunt duobus marginibus in fasciis umeralibus ephod in parte eius anteriore. ¹⁹ Et fecerunt duos anulos aureos et posuerunt super duas summitates pectoralis in eius margine interiore contra ephod, sicut praecepit Dominus Moysi. ²⁰ Feceruntque duos anulos aureos, quos posuerunt in duabus fasciis umeralibus ephod deorsum in latere eius anteriore secus iuncturam eius super balteum ephod. ²¹ Et strinxerunt pectorale anulis eius ad anulos ephod vitta hyacinthina, ut esset super balteum ephod, ne amoveretur ab ephod, sicut praecepit Dominus Moysi. ²² Fecerunt quoque pallium ephod opere textili totum hyacinthinum ²³ et capitium in medio eius supra oramque per gyrum sicut in capitio loricae; ²⁴ deorsum autem ad pedes mala punica ex hyacintho, purpura, cocco ac bysso retorta ²⁵ et tintinnabula de auro purissimo, quae posuerunt inter malogranata in inferiore parte pallii per gyrum, ²⁶ ut sit tintinnabulum inter singula mala punica, quibus ornatus incedebat pontifex, quando ministerio fungebatur, sicut praeceperat Dominus Moysi. ²⁷ Fecerunt et tunicas byssinas opere textili Aaron et filiis eius ²⁸ et tiaram et ornatum mitrarum ex bysso, feminalia quoque linea ex bysso retorta, ²⁹ cingulum vero de bysso retorta, hyacintho, purpura ac cocco, arte plumaria, sicut praeceperat Dominus Moysi. ³⁰ Fecerunt et laminam diadema sanctitatis de auro purissimo; scripseruntque in ea opere caelatoris: "Sanctum Domino"; ³¹ et strinxerunt eam desuper cum tiara vitta hyacinthina, sicut praeceperat Dominus Moysi.

³² Perfectum est igitur omne opus habitaculi et tabernaculi conventus; feceruntque filii Israel cuncta, quae praeceperat Dominus Moysi: sic fecerunt. ³³ Et obtulerunt habitaculum et tabernaculum et universam supellectilem, fibulas, tabulas, vectes, columnas ac bases, ³⁴ opertorium de pellibus arietum rubricatis et operimentum de pellibus delphini, velum, ³⁵ arcam testimonii, vectes, propitiatorium, ³⁶ mensam cum vasis suis et propositionis panibus, ³⁷ candelabrum ex auro puro, lucernas in ordine earum et utensilia earum cum oleo candelabri, ³⁸ altare aureum et unguentum et thymiama ex aromatibus et velum in introitu tabernaculi, ³⁹ altare aeneum, craticulam aeneam, vectes et vasa eius omnia, labrum cum basi sua, ⁴⁰ tentoria atrii et columnas cum basibus suis, velum in introitu atrii funiculosque illius et paxillos. Nihil ex vasis defuit, quae in ministerium habitaculi in tabernaculo conventus iussa sunt fieri. ⁴¹ Vestes quoque textas, quibus sacerdotes utuntur in sanctuario, et vestes sacras Aaron sacerdotis et vestes filiorum eius ⁴² obtulerunt filii Israel, sicut praeceperat Dominus Moysi. ⁴³ Quae postquam Moyses cuncta vidit completa, benedixit eis.