Read the Bible

¹ Locutusque est Dominus ad Moysen dicens: ² "Mense pri mo, die prima mensis eriges habitaculum, tabernaculum conventus, ³ et pones in eo arcam testimonii, abscondes illam velo; ⁴ et, illata mensa, pones super eam, quae rite praecepta sunt. Candelabrum stabit cum lucernis suis ⁵ et altare aureum, in quo adoletur incensum, coram arca testimonii. Velum in introitu habitaculi pones, ⁶ et ante tabernaculum conventus altare holocausti, ⁷ et labrum inter altare et tabernaculum conventus et implebis illud aqua. ⁸ Circumdabisque atrium tentoriis et pones velum in porta eius. ⁹ Et, assumpto unctionis oleo, unges habitaculum et omnia, quae in eo sunt, et consecrabis illud cum vasis suis, et erit sanctum. ¹⁰ Unges quoque altare holocausti et omnia vasa eius et consecrabis altare, et erit sanctum sanctorum. ¹¹ Et unges labrum cum basi sua et consecrabis illud. ¹² Applicabisque Aaron et filios eius ad fores tabernaculi conventus; et lotos aqua ¹³ indues Aaron sanctis vestibus, unges et consecrabis eum, ut mihi sacerdotio fungatur; ¹⁴ filios eius applicabis et vesties eos tunicis ¹⁵ et unges eos, sicut unxisti patrem eorum, ut mihi sacerdotio fungantur, et unctio eorum erit eis in sacerdotium sempiternum in generationibus eorum".

¹⁶ Fecitque Moyses omnia, quae praeceperat ei Dominus: sic fecit. ¹⁷ Igitur mense primo anni secundi, prima die mensis collocatum est habitaculum. ¹⁸ Erexitque Moyses illud et posuit bases ac tabulas et vectes statuitque columnas ¹⁹ et expandit tentorium super habitaculum, imposito desuper operimento, sicut Dominus imperaverat Moysi. ²⁰ Sumpsit et posuit testimonium in arca et, subditis infra vectibus, posuit propitiatorium desuper. ²¹ Cumque intulisset arcam in habitaculum, appendit ante eam velum, sicut iusserat Dominus Moysi. ²² Posuit et mensam in tabernaculo conventus ad plagam septentrionalem extra velum, ²³ ordinatis coram propositionis panibus, sicut praeceperat Dominus Moysi. ²⁴ Posuit et candelabrum in tabernaculo conventus e regione mensae in parte australi, ²⁵ locatis per ordinem lucernis, sicut praeceperat Dominus Moysi. ²⁶ Posuit et altare aureum in tabernaculo conventus coram propitiatorio ²⁷ et adolevit super eo incensum aromatum, sicut iusserat Dominus Moysi. ²⁸ Posuit et velum in introitu habitaculi ²⁹ et altare holocausti in vestibulo habitaculi, tabernaculi conventus, offerens in eo holocaustum et sacrificium, sicut Dominus imperaverat Moysi. ³⁰ Labrum quoque statuit inter tabernaculum conventus et altare implens illud aqua; ³¹ laveruntque Moyses et Aaron ac filii eius manus suas et pedes, ³² cum ingrederentur tabernaculum conventus et accederent ad altare, sicut praeceperat Dominus Moysi. ³³ Erexit et atrium per gyrum habitaculi et altaris, ducto in introitu eius velo. Sic complevit opus.

³⁴ Et operuit nubes tabernaculum conventus, et gloria Domini implevit habitaculum. ³⁵ Nec poterat Moyses ingredi tabernaculum conventus, quia habitavit nubes super illud, et gloria Domini replevit habitaculum. ³⁶ Si quando nubes de tabernaculo ascendebat, proficiscebantur filii Israel in omnibus stationibus suis; ³⁷ si autem non ascendebat nubes, non proficiscebantur usque in diem, quo levabatur. ³⁸ Nubes quippe Domini incubabat per diem habitaculo, et ignis in nocte, ante oculos universae domus Israel per cunctas mansiones suas.