Read the Bible

¹ Fecit et altare holocausti de lignis acaciae quinque cubi torum per quadrum et trium in altitudine, ² cuius cornua de angulis procedebant; operuitque illud laminis aeneis. ³ Et in usus eius paravit ex aere vasa diversa: lebetes, vatilla et pateras, fuscinulas et ignium receptacula. ⁴ Craticulamque eius in modum retis fecit aeneam subter marginem altaris ab imo usque ad medium eius, ⁵ fusis quattuor anulis per totidem craticulae summitates, ad immittendos vectes ad portandum. ⁶ Quos et ipsos fecit de lignis acaciae et operuit laminis aeneis; ⁷ induxitque in circulos, qui in lateribus altaris eminebant. Ipsum autem altare non erat solidum, sed cavum ex tabulis et intus vacuum. ⁸ Fecit et labrum aeneum cum basi sua de speculis mulierum, quae excubabant in ostio tabernaculi conventus.

⁹ Fecit et atrium, in cuius australi plaga erant tentoria de bysso retorta cubitorum centum; ¹⁰ columnae aeneae viginti cum basibus suis; unci columnarum et anuli earum argentei. ¹¹ Aeque ad septentrionalem plagam tentoria, columnae basesque et unci anulique columnarum eiusdem mensurae et operis ac metalli erant. ¹² In ea vero plaga, quae ad occidentem respicit, fuerunt tentoria cubitorum quinquaginta, columnae decem cum basibus suis; et unci columnarum anulique earum argentei. ¹³ Porro contra orientem quinquaginta cubitorum paravit tentoria, ¹⁴ e quibus quindecim cubitos columnarum trium cum basibus suis unum tenebat latus; ¹⁵ et in parte altera quia inter utraque introitum tabernaculi fecit quindecim aeque cubitorum erant tentoria columnaeque tres et bases totidem. ¹⁶ Cuncta atrii tentoria in circuitu ex bysso retorta texuerat. ¹⁷ Bases columnarum fuere aeneae, unci autem earum et anuli earum argentei et capita earum vestivit argento et omnes columnas atrii cinxit anulis argenteis. ¹⁸ Et in introitu eius opere plumario fecit velum ex hyacintho, purpura, cocco ac bysso retorta; quod habebat viginti cubitos in longitudine, altitudo vero quinque cubitorum erat iuxta mensuram, quam cuncta atrii tentoria habebant. ¹⁹ Columnae autem in ingressu fuere quattuor cum basibus aeneis, uncis argenteis; capitaque et anulos earum vestivit argento. ²⁰ Paxillos quoque habitaculi et atrii per gyrum fecit aeneos.

²¹ Hic est census habitaculi, habitaculi testimonii, qui recensitus est iuxta praeceptum Moysi ministerio Levitarum per manum Ithamar filii Aaron sacerdotis. ²² Beseleel filius Uri filii Hur de tribu Iudae fecit cuncta, quae praeceperat Dominus Moysi, ²³ iuncto sibi socio Ooliab filio Achisamech de tribu Dan fabro et polymitario atque plumario ex hyacintho, purpura, cocco et bysso. ²⁴ Omne aurum, quod expensum est in opere sanctuarii et quod oblatum est in donariis, viginti novem talentorum fuit et septingentorum triginta siclorum ad mensuram sicli sanctuarii. ²⁵ Argentum autem eorum, qui in congregatione recensiti sunt, centum talentorum fuit et mille septingentorum et septuaginta quinque siclorum ad mensuram sicli sanctuarii. ²⁶ Beca, id est dimidium sicli iuxta mensuram sicli sanctuarii, dedit quisquis transit ad censum a viginti annis et supra, de sescentis tribus milibus et quingentis quinquaginta armatorum. ²⁷ De talentis centum argenti conflatae sunt bases sanctuarii et veli, singulis talentis per bases singulas supputatis. ²⁸ De mille autem septingentis et septuaginta quinque siclis fecit uncos columnarum et vestivit capita earum et cinxit eas argento. ²⁹ Aeris quoque oblata sunt septuaginta talenta et duo milia et quadringenti sicli, ³⁰ ex quibus fecit bases in introitu tabernaculi conventus et altare aeneum cum craticula sua omniaque vasa, quae ad usum eius pertinent, ³¹ et bases atrii tam in circuitu quam in ingressu eius et omnes paxillos habitaculi atque atrii per gyrum.