Read the Bible

¹ Sapientia hominis lucet in vultu ejus, et potentissimus faciem illius commutabit.² Ego os regis observo, et præcepta juramenti Dei.³ Ne festines recedere a facie ejus, neque permaneas in opere malo : quia omne quod voluerit faciet.⁴ Et sermo illius potestate plenus est, nec dicere ei quisquam potest : Quare ita facis ?

⁵ Qui custodit præceptum non experietur quidquam mali. Tempus et responsionem cor sapientis intelligit.⁶ Omni negotio tempus est, et opportunitas : et multa hominis afflictio,⁷ quia ignorat præterita, et futura nullo scire potest nuntio.

⁸ Non est in hominis potestate prohibere spiritum, nec habet potestatem in die mortis : nec sinitur quiescere ingruente bello, neque salvabit impietas impium.⁹ Omnia hæc consideravi, et dedi cor meum in cunctis operibus quæ fiunt sub sole. Interdum dominatur homo homini in malum suum.¹⁰ Vidi impios sepultos, qui etiam cum adhuc viverent in loco sancto erant, et laudabantur in civitate quasi justorum operum. Sed et hoc vanitas est.¹¹ Etenim quia non profertur cito contra malos sententia, absque timore ullo filii hominum perpetrant mala.¹² Attamen peccator ex eo quod centies facit malum, et per patientiam sustentatur ; ego cognovi quod erit bonum timentibus Deum, qui verentur faciem ejus.

¹³ Non sit bonum impio, nec prolongentur dies ejus, sed quasi umbra transeant qui non timent faciem Domini.¹⁴ Est et alia vanitas quæ fit super terram : sunt justi quibus mala proveniunt quasi opera egerint impiorum : et sunt impii qui ita securi sunt quasi justorum facta habeant. Sed et hoc vanissimum judico.