Read the Bible

¹ Melius est nomen bonum quam unguenta pretiosa, et dies mortis die nativitatis.² Melius est ire ad domum luctus quam ad domum convivii ; in illa enim finis cunctorum admonetur hominum, et vivens cogitat quid futurum sit.³ Melior est ira risu, quia per tristitiam vultus corrigitur animus delinquentis.⁴ Cor sapientium ubi tristitia est, et cor stultorum ubi lætitia.⁵ Melius est a sapiente corripi, quam stultorum adulatione decipi ;⁶ quia sicut sonitus spinarum ardentium sub olla, sic risus stulti. Sed et hoc vanitas.⁷ Calumnia conturbat sapientem, et perdet robur cordis illius.⁸ Melior est finis orationis quam principium. Melior est patiens arrogante.⁹ Ne sis velox ad irascendum, quia ira in sinu stulti requiescit.

¹⁰ Ne dicas : Quid putas causæ est quod priora tempora meliora fuere quam nunc sunt ? stulta enim est hujuscemodi interrogatio.¹¹ Utilior est sapientia cum divitiis, et magis prodest videntibus solem.¹² Sicut enim protegit sapientia, sic protegit pecunia ; hoc autem plus habet eruditio et sapientia, quod vitam tribuunt possessori suo.¹³ Considera opera Dei, quod nemo possit corrigere quem ille despexerit.