Read the Bible

¹ Confitebor tibi, Domine, in toto corde meo ; narrabo omnia mirabilia tua.² Lætabor et exsultabo in te ; psallam nomini tuo, Altissime.³ In convertendo inimicum meum retrorsum ; infirmabuntur, et peribunt a facie tua.⁴ Quoniam fecisti judicium meum et causam meam ; sedisti super thronum, qui judicas justitiam.⁵ Increpasti gentes, et periit impius : nomen eorum delesti in æternum, et in sæculum sæculi.⁶ Inimici defecerunt frameæ in finem, et civitates eorum destruxisti. Periit memoria eorum cum sonitu ;⁷ et Dominus in æternum permanet. Paravit in judicio thronum suum ;⁸ et ipse judicabit orbem terræ in æquitate, judicabit populos in justitia.⁹ Et factus est Dominus refugium pauperi ; adjutor in opportunitatibus, in tribulatione.¹⁰ Et sperent in te qui noverunt nomen tuum, quoniam non dereliquisti quærentes te, Domine.¹¹ Psallite Domino qui habitat in Sion ; annuntiate inter gentes studia ejus,¹² quoniam requirens sanguinem eorum recordatus est ; non est oblitus clamorem pauperum.

¹³ Miserere mei, Domine : vide humilitatem meam de inimicis meis,¹⁴ qui exaltas me de portis mortis, ut annuntiem omnes laudationes tuas in portis filiæ Sion.¹⁵ Exultabo in salutari tuo. Infixæ sunt gentes in interitu quem fecerunt ; in laqueo isto quem absconderunt comprehensus est pes eorum.¹⁶ Cognoscetur Dominus judicia faciens ; in operibus manuum suarum comprehensus est peccator.¹⁷ Convertantur peccatores in infernum, omnes gentes quæ obliviscuntur Deum.¹⁸ Quoniam non in finem oblivio erit pauperis ; patientia pauperum non peribit in finem.