Read the Bible

¹ Diligam te, Domine, fortitudo mea.

² Dominus firmamentum meum, et refugium meum, et liberator meus. Deus meus adjutor meus, et sperabo in eum ; protector meus, et cornu salutis meæ, et susceptor meus.

³ Laudans invocabo Dominum, et ab inimicis meis salvus ero.

⁴ Circumdederunt me dolores mortis, et torrentes iniquitatis conturbaverunt me.

⁵ Dolores inferni circumdederunt me, præoccupaverunt me laquei mortis.

⁶ In tribulatione mea invocavi Dominum, et ad Deum meum clamavi : et exaudivit de templo sancto suo vocem meam ; et clamor meus in conspectu ejus introivit in aures ejus.⁷ Commota est, et contremuit terra, fundamenta montium conturbata sunt, et commota sunt, quoniam iratus est eis.

⁸ Ascendit fumus in ira ejus, et ignis a facie ejus exarsit ; carbones succensi sunt ab eo.

⁹ Inclinavit cælos, et descendit ; et caligo sub pedibus ejus.

¹⁰ Et ascendit super cherubim, et volavit ; volavit super pennas ventorum.

¹¹ Et posuit tenebras latibulum suum ; in circuitu ejus tabernaculum ejus, tenebrosa aqua in nubibus aëris.

¹² Præ fulgore in conspectu ejus nubes transierunt, grando et carbones ignis.

¹³ Et intonuit de cælo Dominus, et Altissimus dedit vocem suam : grando et carbones ignis.

¹⁴ Et misit sagittas suas, et dissipavit eos ; fulgura multiplicavit, et conturbavit eos.

¹⁵ Et apparuerunt fontes aquarum, et revelata sunt fundamenta orbis terrarum, ab increpatione tua, Domine, ab inspiratione spiritus iræ tuæ.

¹⁶ Misit de summo, et accepit me ; et assumpsit me de aquis multis.

¹⁷ Eripuit me de inimicis meis fortissimis, et ab his qui oderunt me. Quoniam confortati sunt super me,

¹⁸ prævenerunt me in die afflictionis meæ ; et factus est Dominus protector meus.

¹⁹ Et eduxit me in latitudinem ; salvum me fecit, quoniam voluit me,

²⁰ et retribuet mihi Dominus secundum justitiam meam, et secundum puritatem manuum mearum retribuet mihi ;

²¹ quia custodivi vias Domini, nec impie gessi a Deo meo ;

²² quoniam omnia judicia ejus in conspectu meo, et justitias ejus non repuli a me.

²³ Et ero immaculatus cum eo ; et observabo me ab iniquitate mea.

²⁴ Et retribuet mihi Dominus secundum justitiam meam, et secundum puritatem manuum mearum in conspectu oculorum ejus.