Read the Bible

¹ The titil of the two and sixtithe salm. `The salm of Dauid, `whanne he was in the desert of Judee. God, my God, Y wake to thee ful eerli. Mi soule thirstide to thee; my fleisch thirstide to thee ful many foold.² In a lond forsakun with out wei, and with out water, so Y apperide to thee in hooli; that Y schulde se thi vertu, and thi glorie.

³ For thi merci is betere than lyues; my lippis schulen herie thee.⁴ So Y schal blesse thee in my lijf; and in thi name Y schal reise myn hondis.⁵ Mi soule be fillid as with inner fatnesse and vttermere fatnesse; and my mouth schal herie with lippis of ful out ioiyng.⁶ So Y hadde mynde on thee on my bed, in morewtidis Y shal thenke of thee;

⁷ for thou were myn helpere. And in the keueryng of thi wyngis Y schal make `ful out ioye, my soule cleuede after thee;⁸ thi riythond took me vp.⁹ Forsothe thei souyten in veyn my lijf, thei schulen entre in to the lower thingis of erthe;¹⁰ thei schulen be bitakun in to the hondis of swerd, thei schulen be maad the partis of foxis.¹¹ But the king schal be glad in God; and alle men schulen be preysid that sweren in hym, for the mouth of hem, that speken wickid thingis, is stoppid.