Read the Bible

¹ The titil of the oon and sixtithe salm. To the victorie on Iditum, the salm of Dauid. Whether my soule schal not be suget to God; for myn heelthe is of hym.² For whi he is bothe my God, and myn heelthe; my `taker vp, Y schal no more be moued.³ Hou longe fallen ye on a man? alle ye sleen; as to a wal bowid, and a wal of stoon with out morter cast doun.⁴ Netheles thei thouyten to putte awei my prijs, Y ran in thirst; with her mouth thei blessiden, and in her herte thei cursiden.⁵ Netheles, my soule, be thou suget to God; for my pacience is of hym.⁶ For he is my God, and my saueour; myn helpere, Y schal not passe out.⁷ Myn helthe, and my glorie is in God; God is the yyuer of myn help, and myn hope is in God.

⁸ Al the gaderyng togidere of the puple, hope ye in God, schede ye out youre hertis bifore hym; God is oure helpere with outen ende.⁹ Netheles the sones of men ben veyne; the sones of men ben liers in balauncis, that thei disseyue of vanytee in to the same thing.¹⁰ Nile ye haue hope in wickidnesse, and nyle ye coueyte raueyns; if ritchessis be plenteuouse, nyle ye sette the herte therto.¹¹ God spak onys, Y herde these twei thingis, that power is of God, and, thou Lord, mercy is to thee;¹² for thou schalt yelde to ech man bi hise werkis.