Read the Bible

¹ The titil of the thre and sixtithe salm. `In Ebrewe thus, To the victorie, the salm of Dauid. `In Jerom `thus, To the ouercomer, the song of Dauid. God, here thou my preier, whanne Y biseche; delyuere thou my soule fro the drede of the enemy.² Thou hast defendid me fro the couent of yuele doers; fro the multitude of hem that worchen wickidnesse.³ For thei scharpiden her tungis as a swerd, thei benten a bowe, a bittir thing;⁴ for to schete in priuetees hym that is vnwemmed.⁵ Sodeynli thei schulen schete hym, and thei schulen not drede; thei maden stidefast to hem silf a wickid word. Thei telden, that thei schulden hide snaris; thei seiden, Who schal se hem?⁶ Thei souyten wickidnessis; thei souyten, and failiden in sekinge. A man neiyhe to deep herte;

⁷ and God schal be enhaunsid. The arowis of `litle men ben maad the woundis of hem;⁸ and the tungis of hem ben maad sijk ayens hem. Alle men ben disturblid, that sien hem;⁹ and ech man dredde. And thei telden the werkis of God; and vndurstoden the dedis of God.¹⁰ The iust man schal be glad in the Lord, and schal hope in hym; and alle men of riytful herte schulen be preisid.