Read the Bible

¹ PSALMUS. Canticum. Pro die Sabbati. [92:2] Bonum est confiteri Domino et psallere nomini tuo, Altissime, ² [92:3] annuntiare mane misericordiam tuam et veritatem tuam per noctem ³ [92:4] in decachordo et psalterio, cum cantico in cithara. ⁴ [92:5] Quia delectasti me, Domine, in factura tua, et in operibus manuum tuarum exsultabo. ⁵ [92:6] Quam magnificata sunt opera tua, Domine: nimis profundae factae sunt cogitationes tuae. ⁶ [92:7] Vir insipiens non cognoscet, et stultus non intelleget haec.

⁷ [92:8] Cum germinaverint peccatores sicut fenum, et floruerint omnes, qui operantur iniquitatem, hoc tamen erit ad interitum in saeculum saeculi; ⁸ [92:9] tu autem altissimus in aeternum, Domine. ⁹ [92:10] Quoniam ecce inimici tui, Domine, quoniam ecce inimici tui peribunt, et dispergentur omnes, qui operantur iniquitatem. ¹⁰ [92:11] Exaltabis sicut unicornis cornu meum, perfusus sum oleo uberi. ¹¹ [92:12] Et despiciet oculus meus inimicos meos, et in insurgentibus in me malignantibus audiet auris mea. - ¹² [92:13] Iustus ut palma florebit, sicut cedrus Libani succrescet. ¹³ [92:14] Plantati in domo Domini, in atriis Dei nostri florebunt. ¹⁴ [92:15] Adhuc fructus dabunt in senecta, uberes et bene virentes erunt, ¹⁵ [92:16] ut annuntient quoniam rectus Dominus, refugium meum, et non est iniquitas in eo.