Read the Bible

¹ Qui habitat in protectione Altissimi, sub umbra Omnipotentis commorabitur. ² Dicet Domino: "Refugium meum et fortitudo mea, Deus meus, sperabo in eum". ³ Quoniam ipse liberabit te de laqueo venantium et a verbo maligno. ⁴ Alis suis obumbrabit tibi, et sub pennas eius confugies; scutum et lorica veritas eius. ⁵ Non timebis a timore nocturno, a sagitta volante in die, ⁶ a peste perambulante in tenebris, ab exterminio vastante in meridie. ⁷ Cadent a latere tuo mille et decem milia a dextris tuis; ad te autem non appropinquabit. ⁸ Verumtamen oculis tuis considerabis et retributionem peccatorum videbis.

⁹ Quoniam tu es, Domine, refugium meum. Altissimum posuisti habitaculum tuum. ¹⁰ Non accedet ad te malum, et flagellum non appropinquabit tabernaculo tuo, ¹¹ quoniam angelis suis mandabit de te, ut custodiant te in omnibus viis tuis. ¹² In manibus portabunt te, ne forte offendas ad lapidem pedem tuum. ¹³ Super aspidem et basiliscum ambulabis et conculcabis leonem et draconem. ¹⁴ Quoniam mihi adhaesit, liberabo eum; suscipiam eum, quoniam cognovit nomen meum. ¹⁵ Clamabit ad me, et ego exaudiam eum; cum ipso sum in tribulatione; eripiam eum et glorificabo eum. ¹⁶ Longitudine dierum replebo eum et ostendam illi salutare meum.