Read the Bible

¹ Magistro chori. Ad modum cantici " Mut labben ". PSALMUS. David. [9:2] ALEPH. Confitebor tibi, Domine, in toto corde meo, narrabo omnia mirabilia tua. ² [9:3] Laetabor et exsultabo in te, psallam nomini tuo, Altissime. ³ [9:4] BETH. Cum convertuntur inimici mei retrorsum, infirmantur et pereunt a facie tua. ⁴ [9:5] Quoniam fecisti iudicium meum et causam meam, sedisti super thronum, qui iudicas iustitiam. ⁵ [9:6] GHIMEL. Increpasti gentes, perdidisti impium; nomen eorum delesti in aeternum et in saeculum saeculi. ⁶ [9:7] Inimici defecerunt, solitudines sempiternae factae sunt; et civitates destruxisti: periit memoria eorum cum ipsis. ⁷ [9:8] HE. Dominus autem in aeternum sedebit, paravit in iudicium thronum suum; ⁸ [9:9] et ipse iudicabit orbem terrae in iustitia, iudicabit populos in aequitate. ⁹ [9:10] VAU. Et erit Dominus refugium oppresso, refugium in opportunitatibus, in tribulatione. ¹⁰ [9:11] Et sperent in te, qui noverunt nomen tuum, quoniam non dereliquisti quaerentes te, Domine.

¹¹ [9:12] ZAIN. Psallite Domino, qui habitat in Sion; annuntiate inter gentes studia eius. ¹² [9:13] Quoniam requirens sanguinem recordatus est eorum, non est oblitus clamorem pauperum. ¹³ [9:14] HETH. Miserere mei, Domine; vide afflictionem meam de inimicis meis, qui exaltas me de portis mortis, ¹⁴ [9:15] ut annuntiem omnes laudationes tuas in portis filiae Sion, exsultem in salutari tuo. ¹⁵ [9:16] TETH. Infixae sunt gentes in fovea, quam fecerunt; in laqueo isto, quem absconderunt, comprehensus est pes eorum. ¹⁶ [9:17] Manifestavit se Dominus iudicium faciens; in operibus manuum suarum comprehensus est peccator. ¹⁷ [9:18] IOD. Convertentur peccatores in infernum, omnes gentes, quae obliviscuntur Deum. ¹⁸ [9:19] CAPH. Quoniam non in finem oblivio erit pauperis; exspectatio pauperum non peribit in aeternum. ¹⁹ [9:20] Exsurge, Domine, non confortetur homo; iudicentur gentes in conspectu tuo. ²⁰ [9:21] Constitue, Domine, terrorem super eos; sciant gentes quoniam homines sunt.