Read the Bible

¹ Maskil. Ethan Ezrahitae. [89:2] Misericordias Domini in aeternum cantabo; in generationem et generationem annuntiabo veritatem tuam in ore meo. ² [89:3] Quoniam dixisti: "In aeternum misericordia aedificabitur", in caelis firmabitur veritas tua. ³ [89:4] "Disposui testamentum electo meo, iuravi David servo meo: ⁴ [89:5] Usque in aeternum confirmabo semen tuum et aedificabo in generationem et generationem sedem tuam".

⁵ [89:6] Confitebuntur caeli mirabilia tua, Domine, etenim veritatem tuam in ecclesia sanctorum. ⁶ [89:7] Quoniam quis in nubibus aequabitur Domino, similis erit Domino in filiis Dei? ⁷ [89:8] Deus, metuendus in consilio sanctorum, magnus et terribilis super omnes, qui in circuitu eius sunt. ⁸ [89:9] Domine, Deus virtutum, quis similis tibi? Potens es, Domine, et veritas tua in circuitu tuo. ⁹ [89:10] Tu dominaris superbiae maris, elationes fluctuum eius tu mitigas. ¹⁰ [89:11] Tu conculcasti sicut vulneratum Rahab, in brachio virtutis tuae dispersisti inimicos tuos. ¹¹ [89:12] Tui sunt caeli, et tua est terra, orbem terrae et plenitudinem eius tu fundasti; ¹² [89:13] Aquilonem et austrum tu creasti, Thabor et Hermon in nomine tuo exsultabunt. ¹³ [89:14] Tibi brachium cum potentia; firma est manus tua, et exaltata dextera tua. ¹⁴ [89:15] Iustitia et iudicium firmamentum sedis tuae. Misericordia et veritas praecedent faciem tuam.

¹⁵ [89:16] Beatus populus, qui scit iubilationem. Domine, in lumine vultus tui ambulabunt ¹⁶ [89:17] et in nomine tuo exsultabunt tota die et in iustitia tua exaltabuntur, ¹⁷ [89:18] quoniam decor virtutis eorum tu es, et in beneplacito tuo exaltabitur cornu nostrum. ¹⁸ [89:19] Quia Domini est scutum nostrum, et Sancti Israel rex noster.

¹⁹ [89:20] Tunc locutus es in visione sanctis tuis et dixisti: "Posui adiutorium in potente et exaltavi electum de plebe. ²⁰ [89:21] Inveni David servum meum; oleo sancto meo unxi eum. ²¹ [89:22] Manus enim mea firma erit cum eo, et brachium meum confortabit eum. ²² [89:23] Nihil proficiet inimicus in eo, et filius iniquitatis non opprimet eum. ²³ [89:24] Et concidam a facie ipsius inimicos eius et odientes eum percutiam. ²⁴ [89:25] Et veritas mea et misericordia mea cum ipso, et in nomine meo exaltabitur cornu eius. ²⁵ [89:26] Et ponam super mare manum eius et super flumina dexteram eius. ²⁶ [89:27] Ipse invocabit me: "Pater meus es tu, Deus meus et refugium salutis meae". ²⁷ [89:28] Et ego primogenitum ponam illum, excelsum prae regibus terrae. ²⁸ [89:29] In aeternum servabo illi misericordiam meam; et testamentum meum fidele ipsi. ²⁹ [89:30] Et ponam in saeculum saeculi semen eius; et thronum eius sicut dies caeli. ³⁰ [89:31] Si autem dereliquerint filii eius legem meam et in iudiciis meis non ambulaverint, ³¹ [89:32] si iustificationes meas profanaverint et mandata mea non custodierint, ³² [89:33] visitabo in virga delictum eorum et in verberibus iniquitatem eorum. ³³ [89:34] Misericordiam autem meam non avertam ab eo neque mentiar in veritate mea. ³⁴ [89:35] Non profanabo testamentum meum et, quae procedunt de labiis meis, non faciam irrita. ³⁵ [89:36] Semel iuravi in sancto meo: David non mentiar. ³⁶ [89:37] Semen eius in aeternum manebit, et thronus eius sicut sol in conspectu meo ³⁷ [89:38] et sicut luna firmus stabit in aeternum et testis in caelo fidelis".

³⁸ [89:39] Tu vero reppulisti et reiecisti, iratus es contra christum tuum; ³⁹ [89:40] evertisti testamentum servi tui, profanasti in terram diadema eius. ⁴⁰ [89:41] Destruxisti omnes muros eius, posuisti munitiones eius in ruinas. ⁴¹ [89:42] Diripuerunt eum omnes transeuntes viam, factus est opprobrium vicinis suis. ⁴² [89:43] Exaltasti dexteram deprimentium eum, laetificasti omnes inimicos eius. ⁴³ [89:44] Avertisti aciem gladii eius et non es auxiliatus ei in bello. ⁴⁴ [89:45] Finem posuisti splendori eius et sedem eius in terram collisisti. ⁴⁵ [89:46] Minorasti dies iuventutis eius, perfudisti eum confusione. ⁴⁶ [89:47] Usquequo, Domine, absconderis in finem, exardescet sicut ignis ira tua? ⁴⁷ [89:48] Memorare, quam brevis mea substantia. Ad quam vanitatem creasti omnes filios hominum? ⁴⁸ [89:49] Quis est homo, qui vivet et non videbit mortem, eruet animam suam de manu inferi? ⁴⁹ [89:50] Ubi sunt misericordiae tuae antiquae, Domine, sicut iurasti David in veritate tua? ⁵⁰ [89:51] Memor esto, Domine, opprobrii servorum tuorum, quod continui in sinu meo, multarum gentium, ⁵¹ [89:52] quo exprobraverunt inimici tui, Domine, quo exprobraverunt vestigia christi tui. ⁵² [89:53] Benedictus Dominus in aeternum. Fiat, fiat.