Read the Bible

¹ Canticum. PSALMUS. Filiorum Core. Magistro chori. Secundum " Mahalat ". Ad cantandum. Maskil. Heman Ezrahitae. [88:2] Domine, Deus salutis meae, in die clamavi et nocte coram te. ² [88:3] Intret in conspectu tuo oratio mea; inclina aurem tuam ad precem meam. ³ [88:4] Quia repleta est malis anima mea, et vita mea inferno appropinquavit. ⁴ [88:5] Aestimatus sum cum descendentibus in lacum, factus sum sicut homo sine adiutorio. ⁵ [88:6] Inter mortuos liber, sicut vulnerati dormientes in sepulcris; quorum non es memor amplius, et ipsi de manu tua abscissi sunt. ⁶ [88:7] Posuisti me in lacu inferiori, in tenebrosis et in umbra mortis. ⁷ [88:8] Super me gravatus est furor tuus, et omnes fluctus tuos induxisti super me. ⁸ [88:9] Longe fecisti notos meos a me, posuisti me abominationem eis; conclusus sum et non egrediar. ⁹ [88:10] Oculi mei languerunt prae afflictione. Clamavi ad te, Domine, tota die, expandi ad te manus meas. -

¹⁰ [88:11] Numquid mortuis facies mirabilia, aut surgent umbrae et confitebuntur tibi? ¹¹ [88:12] Numquid narrabit aliquis in sepulcro misericordiam tuam et veritatem tuam in loco perditionis? ¹² [88:13] Numquid cognoscentur in tenebris mirabilia tua, et iustitia tua in terra oblivionis? ¹³ [88:14] Et ego ad te, Domine, clamavi, et mane oratio mea praeveniet te. ¹⁴ [88:15] Ut quid, Domine, repellis animam meam, abscondis faciem tuam a me? ¹⁵ [88:16] Pauper sum ego et moriens a iuventute mea; portavi pavores tuos et conturbatus sum. ¹⁶ [88:17] Super me transierunt irae tuae, et terrores tui exciderunt me. ¹⁷ [88:18] Circuierunt me sicut aqua tota die, circumdederunt me simul. ¹⁸ [88:19] Elongasti a me amicum et proximum, et noti mei sunt tenebrae.