Read the Bible

¹ Magistro chori. Secundum " Ne destruxeris ". PSALMUS. Asaph. Canticum. [75:2] Confitebimur tibi, Deus; confitebimur et invocabimus nomen tuum: narrabimus mirabilia tua. ² [75:3] Cum statuero tempus, ego iustitias iudicabo. ³ [75:4] Si liquefacta est terra et omnes, qui habitant in ea, ego confirmavi columnas eius. ⁴ [75:5] Dixi gloriantibus: "Nolite gloriari!" et delinquentibus: "Nolite exaltare cornu! ⁵ [75:6] Nolite exaltare in altum cornu vestrum; nolite loqui adversus Deum proterva".

⁶ [75:7] Quia neque ab oriente neque ab occidente neque a desertis exaltatio. ⁷ [75:8] Quoniam Deus iudex est: hunc humiliat et hunc exaltat. ⁸ [75:9] Quia calix in manu Domini vini meri plenus mixto. Et inclinavit ex hoc in hoc; verumtamen usque ad faeces epotabunt, bibent omnes peccatores terrae. ⁹ [75:10] Ego autem annuntiabo in saeculum, cantabo Deo Iacob. ¹⁰ [75:11] Et omnia cornua peccatorum confringam, et exaltabuntur cornua iusti.