Read the Bible

¹ Lamentatio David, quam cantavit Domino propter Chus Beniaminitam. [7:2] Domine Deus meus, in te speravi; salvum me fac ex omnibus persequentibus me et libera me, ² [7:3] ne quando rapiat ut leo animam meam discerpens, dum non est qui salvum faciat. ³ [7:4] Domine Deus meus, si feci istud, si est iniquitas in manibus meis, ⁴ [7:5] si reddidi retribuenti mihi mala et exspoliavi inimicum meum dimittens inanem, ⁵ [7:6] persequatur inimicus animam meam et comprehendat et conculcet in terra vitam meam et gloriam meam in pulverem deducat. ⁶ [7:7] Exsurge, Domine, in ira tua et exaltare contra indignationem inimicorum meorum et exsurge, Deus meus, in iudicio, quod mandasti. ⁷ [7:8] Et synagoga populorum circumdabit te, et super hanc in altum regredere: ⁸ [7:9] Dominus iudicat populos. Iudica me, Domine, secundum iustitiam meam et secundum innocentiam meam, quae est in me. ⁹ [7:10] Consumatur nequitia peccatorum; et iustum confirma: scrutans corda et renes Deus iustus.

¹⁰ [7:11] Adiutorium meum apud Deum, qui salvos facit rectos corde. ¹¹ [7:12] Deus iudex iustus, fortis, irascens per singulos dies. ¹² [7:13] Nonne iterum gladium suum exacuit, arcum suum tetendit et paravit illum? ¹³ [7:14] Et paravit sibi vasa mortis, sagittas suas ardentes effecit. ¹⁴ [7:15] Ecce parturiit iniustitiam, concepit dolorem et peperit iniquitatem; ¹⁵ [7:16] lacum aperuit et effodit eum et incidit in foveam, quam fecit. ¹⁶ [7:17] Convertetur dolor eius in caput eius, et in verticem ipsius iniquitas eius descendet. ¹⁷ [7:18] Confitebor Domino secundum iustitiam eius et psallam nomini Domini Altissimi.