Read the Bible

¹ Magistro chori. Secundum " Lilia... ". David.² [69:3] Infixus sum in limo profundi, et non est substantia; veni in profunda aquarum, et fluctus demersit me. ³ [69:4] Laboravi clamans, raucae factae sunt fauces meae; defecerunt oculi mei, dum spero in Deum meum. ⁴ [69:5] Multiplicati sunt super capillos capitis mei, qui oderunt me gratis. Confortati sunt, qui persecuti sunt me inimici mei mendaces; quae non rapui, tunc exsolvebam. ⁵ [69:6] Deus, tu scis insipientiam meam, et delicta mea a te non sunt abscondita. ⁶ [69:7] Non erubescant in me, qui exspectant te, Domine, Domine virtutum. Non confundantur super me, qui quaerunt te, Deus Israel. ⁷ [69:8] Quoniam propter te sustinui opprobrium, operuit confusio faciem meam; ⁸ [69:9] extraneus factus sum fratribus meis et peregrinus filiis matris meae. ⁹ [69:10] Quoniam zelus domus tuae comedit me, et opprobria exprobrantium tibi ceciderunt super me. ¹⁰ [69:11] Et flevi in ieiunio animam meam, et factum est in opprobrium mihi. ¹¹ [69:12] Et posui vestimentum meum cilicium, et factus sum illis in parabolam. ¹² [69:13] Adversum me loquebantur, qui sedebant in porta, et in me canebant, qui bibebant vinum.

¹³ [69:14] Ego vero orationem meam ad te, Domine, in tempore beneplaciti, Deus. In multitudine misericordiae tuae exaudi me, in veritate salutis tuae. ¹⁴ [69:15] Eripe me de luto, ut non infigar, eripiar ab iis, qui oderunt me, et de profundis aquarum. ¹⁵ [69:16] Non me demergat fluctus aquarum, neque absorbeat me profundum, neque urgeat super me puteus os suum. ¹⁶ [69:17] Exaudi me, Domine, quoniam benigna est misericordia tua; secundum multitudinem miserationum tuarum respice in me. ¹⁷ [69:18] Et ne avertas faciem tuam a puero tuo; quoniam tribulor, velociter exaudi me. ¹⁸ [69:19] Accede ad animam meam, vindica eam, propter inimicos meos redime me. ¹⁹ [69:20] Tu scis opprobrium meum et confusionem meam et reverentiam meam. - In conspectu tuo sunt omnes, qui tribulant me; ²⁰ [69:21] opprobrium contrivit cor meum, et elangui. Et sustinui, qui simul contristaretur, et non fuit, et qui consolaretur, et non inveni. ²¹ [69:22] Et dederunt in escam meam fel et in siti mea potaverunt me aceto.

²² [69:23] Fiat mensa eorum coram ipsis in laqueum et in retributiones et in scandalum. ²³ [69:24] Obscurentur oculi eorum, ne videant, et lumbos eorum semper infirma. ²⁴ [69:25] Effunde super eos iram tuam, et furor irae tuae comprehendat eos. ²⁵ [69:26] Fiat commoratio eorum deserta, et in tabernaculis eorum non sit qui inhabitet. ²⁶ [69:27] Quoniam, quem tu percussisti, persecuti sunt, et super dolorem eius, quem vulnerasti, addiderunt. ²⁷ [69:28] Appone iniquitatem super iniquitatem eorum, et non veniant ad iustitiam tuam. ²⁸ [69:29] Deleantur de libro viventium et cum iustis non scribantur. ²⁹ [69:30] Ego autem sum pauper et dolens; salus tua, Deus, suscipit me.

³⁰ [69:31] Laudabo nomen Dei cum cantico et magnificabo eum in laude. ³¹ [69:32] Et placebit Domino super taurum, super vitulum cornua producentem et ungulas. ³² [69:33] Videant humiles et laetentur; quaerite Deum, et vivet cor vestrum, ³³ [69:34] quoniam exaudivit pauperes Dominus et vinctos suos non despexit. ³⁴ [69:35] Laudent illum caeli et terra, maria et omnia reptilia in eis. ³⁵ [69:36] Quoniam Deus salvam faciet Sion et aedificabit civitates Iudae; et inhabitabunt ibi et possidebunt eam. ³⁶ [69:37] Et semen servorum eius hereditabunt eam; et, qui diligunt nomen eius, habitabunt in ea.