Read the Bible

¹ Magistro chori. David. PSALMUS. Canticum. [68:2] Exsurgit Deus, et dissipantur inimici eius; et fugiunt, qui oderunt eum, a facie eius. ² [68:3] Sicut dissipatur fumus, tu dissipas; sicut fluit cera a facie ignis, sic pereunt peccatores a facie Dei. ³ [68:4] Et iusti laetentur et exsultent in conspectu Dei et delectentur in laetitia. ⁴ [68:5] Cantate Deo, psalmum dicite nomini eius; iter facite ei, qui fertur super nubes: Dominus nomen illi. Iubilate in conspectu eius; ⁵ [68:6] pater orphanorum et iudex viduarum, Deus in habitaculo sancto suo. ⁶ [68:7] Deus, qui inhabitare facit desolatos in domo, qui educit vinctos in prosperitatem; verumtamen rebelles habitabunt in arida terra. -

⁷ [68:8] Deus, cum egredereris in conspectu populi tui, cum pertransires in deserto, ⁸ [68:9] terra mota est, etiam caeli distillaverunt a facie Dei Sinai, a facie Dei Israel. ⁹ [68:10] Pluviam voluntariam effundebas, Deus; hereditatem tuam infirmatam, tu refecisti eam. ¹⁰ [68:11] Animalia tua habitabant in ea, parasti in bonitate tua pauperi, Deus. ¹¹ [68:12] Dominus dat verbum; virgines annuntiantes bona sunt agmen ingens: ¹² [68:13] "Reges exercituum fugiunt, fugiunt, et species domus dividit spolia. ¹³ [68:14] Et vos dormitis inter medias caulas: alae columbae nitent argento, et pennae eius pallore auri. ¹⁴ [68:15] Dum dispergit Omnipotens reges super eam, nive dealbatur Selmon".

¹⁵ [68:16] Mons Dei mons Basan, mons cacuminum mons Basan. ¹⁶ [68:17] Ut quid invidetis, montes cacuminum, monti, in quo beneplacitum est Deo inhabitare? Etenim Dominus habitabit in finem. ¹⁷ [68:18] Currus Dei decem milia milium: Dominus venit de Sinai in sancta. ¹⁸ [68:19] Ascendisti in altum, captivam duxisti captivitatem; accepisti in donum homines, ut etiam rebelles habitent apud Dominum Deum. ¹⁹ [68:20] Benedictus Dominus die cotidie; portabit nos Deus salutarium nostrorum. ²⁰ [68:21] Deus noster, Deus ad salvandum; et Domini, Domini exitus mortis. ²¹ [68:22] Verumtamen Deus confringet capita inimicorum suorum, verticem capillatum perambulantium in delictis suis.

²² [68:23] Dixit Dominus: "Ex Basan reducam, reducam de profundo maris, ²³ [68:24] ut intingatur pes tuus in sanguine, lingua canum tuorum ex inimicis portionem inveniat". ²⁴ [68:25] Viderunt ingressus tuos, Deus, ingressus Dei mei, regis mei in sancta. ²⁵ [68:26] Praecedunt cantores, postremi veniunt psallentes. in medio iuvenculae tympanistriae. ²⁶ [68:27] "In ecclesiis benedicite Deo, Domino, vos de fontibus Israel". ²⁷ [68:28] Ibi Beniamin adulescentulus ducens eos, principes Iudae cum turma sua, principes Zabulon, principes Nephthali. ²⁸ [68:29] Manda, Deus, virtuti tuae; confirma hoc, Deus, quod operatus es in nobis. ²⁹ [68:30] A templo tuo in Ierusalem tibi afferent reges munera. ³⁰ [68:31] Increpa feram arundinis, congregationem taurorum in vitulis populorum: prosternant se cum laminis argenti. Dissipa gentes, quae bella volunt. ³¹ [68:32] Venient optimates ex Aegypto, Aethiopia praeveniet manus suas Deo.

³² [68:33] Regna terrae, cantate Deo, psallite Domino, psallite Deo, ³³ [68:34] qui fertur super caelum caeli ad orientem; ecce dabit vocem suam, vocem virtutis. ³⁴ [68:35] Tribuite virtutem Deo. Super Israel magnificentia eius, et virtus eius in nubibus. ³⁵ [68:36] Mirabilis, Deus, de sanctuario tuo! Deus Israel ipse tribuet virtutem et fortitudinem plebi suae. Benedictus Deus!