Read the Bible

¹ Magistro chori. PSALMUS. David. Canticum. [65:2] Te decet hymnus, Deus, in Sion; et tibi reddetur votum in Ierusalem. ² [65:3] Qui audis orationem, ad te omnis caro veniet propter iniquitatem. ³ [65:4] Etsi praevaluerunt super nos impietates nostrae, tu propitiaberis eis. ⁴ [65:5] Beatus, quem elegisti et assumpsisti; inhabitabit in atriis tuis. Replebimur bonis domus tuae, sanctitate templi tui. ⁵ [65:6] Mirabiliter in aequitate exaudies nos, Deus salutis nostrae, spes omnium finium terrae et maris longinqui.

⁶ [65:7] Firmans montes in virtute tua, accinctus potentia. ⁷ [65:8] Compescens sonitum maris, sonitum fluctuum eius et tumultum populorum. ⁸ [65:9] Et timebunt, qui habitant terminos terrae, a signis tuis; exitus orientis et occidentis delectabis. ⁹ [65:10] Visitasti terram et inebriasti eam; multiplicasti locupletare eam. Flumen Dei repletum est aquis; parasti frumenta illorum, quoniam ita parasti eam. ¹⁰ [65:11] Sulcos eius irrigans, glebas eius complanans; imbribus emollis eam, benedicis germini eius. ¹¹ [65:12] Coronasti annum benignitate tua, et vestigia tua stillabunt pinguedinem. ¹² [65:13] Stillabunt pascua deserti, et exsultatione colles accingentur. ¹³ [65:14] Induta sunt ovibus prata, et valles abundabunt frumento; clamabunt, etenim hymnum dicent.