Read the Bible

¹ Magistro chori. PSALMUS. David, [51:2] cum venit ad eum Nathan propheta, postquam cum Bethsabee peccavit. [51:3] Miserere mei, Deus, secundum misericordiam tuam; et secundum multitudinem miserationum tuarum dele iniquitatem meam. ² [51:4] Amplius lava me ab iniquitate mea et a peccato meo munda me. ³ [51:5] Quoniam iniquitatem meam ego cognosco, et peccatum meum contra me est semper. ⁴ [51:6] Tibi, tibi soli peccavi et malum coram te feci, ut iustus inveniaris in sententia tua et aequus in iudicio tuo. ⁵ [51:7] Ecce enim in iniquitate generatus sum, et in peccato concepit me mater mea. ⁶ [51:8] Ecce enim veritatem in corde dilexisti et in occulto sapientiam manifestasti mihi.

⁷ [51:9] Asperges me hyssopo, et mundabor; lavabis me, et super nivem dealbabor. ⁸ [51:10] Audire me facies gaudium et laetitiam, et exsultabunt ossa, quae contrivisti. ⁹ [51:11] Averte faciem tuam a peccatis meis et omnes iniquitates meas dele. ¹⁰ [51:12] Cor mundum crea in me, Deus, et spiritum firmum innova in visceribus meis. ¹¹ [51:13] Ne proicias me a facie tua et spiritum sanctum tuum ne auferas a me. ¹² [51:14] Redde mihi laetitiam salutaris tui et spiritu promptissimo confirma me. ¹³ [51:15] Docebo iniquos vias tuas, et impii ad te convertentur.

¹⁴ [51:16] Libera me de sanguinibus, Deus, Deus salutis meae, et exsultabit lingua mea iustitiam tuam. ¹⁵ [51:17] Domine, labia mea aperies, et os meum annuntiabit laudem tuam. ¹⁶ [51:18] Non enim sacrificio delectaris; holocaustum, si offeram, non placebit. ¹⁷ [51:19] Sacrificium Deo spiritus contribulatus; cor contritum et humiliatum, Deus, non despicies. ¹⁸ [51:20] Benigne fac, Domine, in bona voluntate tua Sion, ut aedificentur muri Ierusalem. ¹⁹ [51:21] Tunc acceptabis sacrificium iustitiae, oblationes et holocausta; tunc imponent super altare tuum vitulos.