Read the Bible

¹ Magistro chori. PSALMUS. David. [31:2] In te, Domine, speravi, non confundar in aeternum; in iustitia tua libera me. ² [31:3] Inclina ad me aurem tuam, accelera, ut eruas me. Esto mihi in rupem praesidii et in domum munitam, ut salvum me facias. ³ [31:4] Quoniam fortitudo mea et refugium meum es tu et propter nomen tuum deduces me et pasces me. ⁴ [31:5] Educes me de laqueo, quem absconderunt mihi, quoniam tu es fortitudo mea. ⁵ [31:6] In manus tuas commendo spiritum meum; redemisti me, Domine, Deus veritatis. ⁶ [31:7] Odisti observantes vanitates supervacuas, ego autem in Domino speravi. ⁷ [31:8] Exsultabo et laetabor in misericordia tua, quoniam respexisti humilitatem meam; agnovisti necessitates animae meae ⁸ [31:9] nec conclusisti me in manibus inimici; statuisti in loco spatioso pedes meos.

⁹ [31:10] Miserere mei, Domine, quoniam tribulor; conturbatus est in maerore oculus meus, anima mea et venter meus. ¹⁰ [31:11] Quoniam defecit in dolore vita mea, et anni mei in gemitibus; infirmata est in paupertate virtus mea, et ossa mea contabuerunt. ¹¹ [31:12] Apud omnes inimicos meos factus sum opprobrium et vicinis meis valde et timor notis meis: qui videbant me foras, fugiebant a me. ¹² [31:13] Oblivioni a corde datus sum tamquam mortuus; factus sum tamquam vas perditum. ¹³ [31:14] Quoniam audivi vituperationem multorum: horror in circuitu; in eo dum convenirent simul adversum me, auferre animam meam consiliati sunt. ¹⁴ [31:15] Ego autem in te speravi, Domine; dixi: "Deus meus es tu, ¹⁵ [31:16] in manibus tuis sortes meae". Eripe me de manu inimicorum meorum et a persequentibus me; ¹⁶ [31:17] illustra faciem tuam super servum tuum, salvum me fac in misericordia tua. ¹⁷ [31:18] Domine, non confundar, quoniam invocavi te; erubescant impii et obmutescant in inferno. ¹⁸ [31:19] Muta fiant labia dolosa, quae loquuntur adversus iustum proterva in superbia et in abusione.

¹⁹ [31:20] Quam magna multitudo dulcedinis tuae, Domine, quam abscondisti timentibus te. Perfecisti eis, qui sperant in te, in conspectu filiorum hominum. ²⁰ [31:21] Abscondes eos in abscondito faciei tuae a conturbatione hominum; proteges eos in tabernaculo a contradictione linguarum. ²¹ [31:22] Benedictus Dominus, quoniam mirificavit misericordiam suam mihi in civitate munita. ²² [31:23] Ego autem dixi in trepidatione mea: "Praecisus sum a conspectu oculorum tuorum". Verumtamen exaudisti vocem orationis meae, dum clamarem ad te. ²³ [31:24] Diligite Dominum, omnes sancti eius: fideles conservat Dominus et retribuit abundanter facientibus superbiam. ²⁴ [31:25] Viriliter agite, et confortetur cor vestrum, omnes, qui speratis in Domino.