Read the Bible

¹ PSALMUS. Canticum festi Dedicationis Templi. David. [30:2] Exaltabo te, Domine, quoniam extraxisti me nec delectasti inimicos meos super me. ² [30:3] Domine Deus meus, clamavi ad te, et sanasti me. ³ [30:4] Domine, eduxisti ab inferno animam meam, vivificasti me, ut non descenderem in lacum. ⁴ [30:5] Psallite Domino, sancti eius, et confitemini memoriae sanctitatis eius, ⁵ [30:6] quoniam ad momentum indignatio eius, et per vitam voluntas eius. Ad vesperum demoratur fletus, ad matutinum laetitia.

⁶ [30:7] Ego autem dixi in securitate mea: "Non movebor in aeternum". ⁷ [30:8] Domine, in voluntate tua praestitisti decori meo virtutem; avertisti faciem tuam a me, et factus sum conturbatus. ⁸ [30:9] Ad te, Domine, clamabam et ad Deum meum deprecabar. ⁹ [30:10] Quae utilitas in sanguine meo, dum descendo in corruptionem? Numquid confitebitur tibi pulvis aut annuntiabit veritatem tuam? ¹⁰ [30:11] Audivit Dominus et misertus est mei, Dominus factus est adiutor meus. ¹¹ [30:12] Convertisti planctum meum in choros mihi, conscidisti saccum meum et accinxisti me laetitia, ¹² [30:13] ut cantet tibi gloria mea et non taceat. Domine Deus meus, in aeternum confitebor tibi.