Read the Bible

¹ David. ALEPH. Ad te, Domine, levavi animam meam, ² BETH. Deus meus, in te confido; non erubescam. Neque exsultent super me inimici mei, ³ GHIMEL. etenim universi, qui sustinent te, non confundentur. Confundantur infideliter agentes propter vanitatem. ⁴ DALETH. Vias tuas, Domine, demonstra mihi et semitas tuas edoce me. ⁵ HE. Dirige me in veritate tua et doce me, quia tu es Deus salutis meae, VAU. et te sustinui tota die. ⁶ ZAIN. Reminiscere miserationum tuarum, Domine, et misericordiarum tuarum, quoniam a saeculo sunt. ⁷ HETH. Peccata iuventutis meae et delicta mea ne memineris; secundum misericordiam tuam memento mei tu, propter bonitatem tuam, Domine.

⁸ TETH. Dulcis et rectus Dominus, propter hoc peccatores viam docebit; ⁹ IOD. diriget mansuetos in iudicio, docebit mites vias suas. ¹⁰ CAPH. Universae viae Domini misericordia et veritas custodientibus testamentum eius et testimonia eius. ¹¹ LAMED. Propter nomen tuum, Domine, propitiaberis peccato meo: multum est enim. ¹² MEM. Quis est homo, qui timet Dominum? Docebit eum viam, quam eligat. ¹³ NUN. Anima eius in bonis demorabitur, et semen eius hereditabit terram. ¹⁴ SAMECH. Familiariter aget Dominus cum timentibus eum, ut testamentum suum manifestet illis.

¹⁵ AIN. Oculi mei semper ad Dominum, quoniam ipse evellet de laqueo pedes meos. ¹⁶ PHE. Respice in me et miserere mei, quia unicus et pauper sum ego. ¹⁷ SADE. Dilata angustias cordis mei et de necessitatibus meis erue me. ¹⁸ Vide humilitatem meam et laborem meum et dimitte universa delicta mea. ¹⁹ RES. Respice inimicos meos, quoniam multiplicati sunt et odio crudeli oderunt me. ²⁰ SIN. Custodi animam meam et erue me; non erubescam, quoniam speravi in te. ²¹ TAU. Innocentia et aequitas custodiant me, quia sustinui te. ²² PHE. Libera, Deus, Israel ex omnibus tribulationibus suis.