Read the Bible

¹ PSALMUS. David. Domine, exaudi orationem meam, auribus percipe obsecrationem meam in veritate tua; exaudi me in tua iustitia. ² Et non intres in iudicium cum servo tuo, quia non iustificabitur in conspectu tuo omnis vivens. ³ Quia persecutus est inimicus animam meam, contrivit in terra vitam meam, collocavit me in obscuris sicut mortuos a saeculo. ⁴ Et anxiatus est in me spiritus meus, in medio mei obriguit cor meum. ⁵ Memor fui dierum antiquorum, meditatus sum in omnibus operibus tuis, in factis manuum tuarum recogitabam. ⁶ Expandi manus meas ad te, anima mea sicut terra sine aqua tibi.

⁷ Velociter exaudi me, Domine; defecit spiritus meus. Non abscondas faciem tuam a me, ne similis fiam descendentibus in lacum. ⁸ Auditam fac mihi mane misericordiam tuam, quia in te speravi. Notam fac mihi viam, in qua ambulem, quia ad te levavi animam meam. ⁹ Eripe me de inimicis meis, Domine, ad te confugi. ¹⁰ Doce me facere voluntatem tuam, quia Deus meus es tu. Spiritus tuus bonus deducet me in terram rectam; ¹¹ propter nomen tuum, Domine, vivificabis me. In iustitia tua educes de tribulatione animam meam ¹² et in misericordia tua disperdes inimicos meos; et perdes omnes, qui tribulant animam meam, quoniam ego servus tuus sum.