Read the Bible

¹ ALLELUIA. Dilexi, quoniam exaudit Dominus vocem deprecationis meae. ² Quia inclinavit aurem suam mihi, cum in diebus meis invocabam. ³ Circumdederunt me funes mortis, et angustiae inferni invenerunt me. Tribulationem et dolorem inveni ⁴ et nomen Domini invocabam: "O Domine, libera animam meam". ⁵ Misericors Dominus et iustus, et Deus noster miseretur. ⁶ Custodiens parvulos Dominus; humiliatus sum, et salvum me faciet. ⁷ Convertere, anima mea, in requiem tuam, quia Dominus benefecit tibi; ⁸ quia eripuit animam meam de morte, oculos meos a lacrimis, pedes meos a lapsu. ⁹ Ambulabo coram Domino in regione vivorum. -

¹⁰ Credidi, etiam cum locutus sum: "Ego humiliatus sum nimis". ¹¹ Ego dixi in trepidatione mea: "Omnis homo mendax". ¹² Quid retribuam Domino pro omnibus, quae retribuit mihi? ¹³ Calicem salutaris accipiam et nomen Domini invocabo. ¹⁴ Vota mea Domino reddam coram omni populo eius. ¹⁵ Pretiosa in conspectu Domini mors sanctorum eius. ¹⁶ O Domine, ego servus tuus, ego servus tuus et filius ancillae tuae. Dirupisti vincula mea: ¹⁷ tibi sacrificabo hostiam laudis et nomen Domini invocabo. ¹⁸ Vota mea Domino reddam coram omni populo eius ¹⁹ in atriis domus Domini, in medio tui, Ierusalem.