Read the Bible

¹ Non nobis, Domine, non nobis, sed nomini tuo da gloriam super misericordia tua et veritate tua. ² Quare dicent gentes: "Ubi est Deus eorum?". ³ Deus autem noster in caelo; omnia, quaecumque voluit, fecit. ⁴ Simulacra gentium argentum et aurum, opera manuum hominum. ⁵ Os habent et non loquentur, oculos habent et non videbunt. ⁶ Aures habent et non audient, nares habent et non odorabunt. ⁷ Manus habent et non palpabunt, pedes habent et non ambulabunt; non clamabunt in gutture suo. ⁸ Similes illis erunt, qui faciunt ea, et omnes, qui confidunt in eis.

⁹ Domus Israel speravit in Domino: adiutorium eorum et scutum eorum est. ¹⁰ Domus Aaron speravit in Domino: adiutorium eorum et scutum eorum est. ¹¹ Qui timent Dominum, speraverunt in Domino: adiutorium eorum et scutum eorum est. ¹² Dominus memor fuit nostri et benedicet nobis: benedicet domui Israel, benedicet domui Aaron, ¹³ benedicet omnibus, qui timent Dominum, pusillis cum maioribus. ¹⁴ Adiciat Dominus super vos, super vos et super filios vestros. ¹⁵ Benedicti vos a Domino, qui fecit caelum et terram. ¹⁶ Caeli, caeli sunt Domino, terram autem dedit filiis hominum. ¹⁷ Non mortui laudabunt te, Domine, neque omnes, qui descendunt in silentium, ¹⁸ sed nos, qui vivimus, benedicimus Domino ex hoc nunc et usque in saeculum.