Read the Bible

¹ ALLELUIA. ALEPH. Confitebor Domino in toto corde meo, BETH. in consilio iustorum et congregatione. ² GHIMEL. Magna opera Domini, DALETH. exquirenda omnibus, qui cupiunt ea. ³ HE. Decor et magnificentia opus eius, VAU. et iustitia eius manet in saeculum saeculi. ⁴ ZAIN. Memoriam fecit mirabilium suorum, HETH. misericors et miserator Dominus. ⁵ TETH. Escam dedit timentibus se; IOD. memor erit in saeculum testamenti sui.

⁶ CAPH. Virtutem operum suorum annuntiavit populo suo, LAMED. ut det illis hereditatem gentium; ⁷ MEM. opera manuum eius veritas et iudicium. NUN. Fidelia omnia mandata eius, ⁸ SAMECH. confirmata in saeculum saeculi, AIN. facta in veritate et aequitate. ⁹ PHE. Redemptionem misit populo suo, SADE. mandavit in aeternum testamentum suum. COPH. Sanctum et terribile nomen eius. ¹⁰ RES. Initium sapientiae timor Domini, SIN. intellectus bonus omnibus facientibus ea; TAU. laudatio eius manet in saeculum saeculi.